Numri një i Drejtorisë së Arsimit në Ferizaj, Agim Berisha, ka filluar vizitën e tij të rregullt nëpër shkollat e Komunës sonë. Vizitat po bëhen për të parë nga afër se sa po respektohen rekomandimet e kësaj drejtori të dhëna për të gjitha shkollat me fillimin e vitit të ri shkollor. “Si zakonisht vizitat i kemi filluar krejt rastësisht, por kemi vërejtur se janë disa boshllëqe që e kanë përcjell procesin edukativo-arsimor me dekada të shumta, prandaj kemi ndërmarr hapa në këtë rrafsh”, ka thënë Berisha, duke shtuar se vizitat nuk do të zhvillohen vetëm këtë muaj, por ato do të jenë të vazhdueshme.”Ne jemi të interesuar që procesi edukativo arsimor të mbahet në nivelin më të mirën të mundshëm në rrethanat dhe kushtet tona”, është shprehur Berisha.
Për më tepër bëhet e ditur se në njërën nga shkollat fillore të Komunës së Ferizajt, gjendja ka qenë tmerruese, për faktin se orët janë shënuar dhe nuk janë mbajtur fare nga mësimdhënësit, gjë për të cilën tashmë janë dhënë edhe vërejtjet e para.”Në një shkollë kemi gjetur gjendjen skandaloze ende ai kolektiv kishte mbetur nën regjimin e shekullit XX . Janë bërë ndryshime të mëdha janë përpunuar, apo jo rekomandimet në atë kolektiv unë nuk di, por e di që kur kemi shkuar në orarin e punës, që është dashur të jenë mësimdhënësit kemi gjetur klasat e zbrazëta dhe kemi ndërmarr masat adekuate ndaj atyre ,por edhe ndaj drejtorit dhe besoj që nuk do të ketë përsëritje të kësaj natyre, jo vetëm në atë shkollë por edhe në shkollat tjera”, ka potencuar Berisha.
Bëhet e ditur se drejtori i asaj shkolle fillore ka marr vërejtje më shkrim, ndërsa mësimdhënësve i është hequr mëditja dhe nëse përsëritet një gjë e tillë ata do të hynë në komisionin disiplinor që më pas mund të vije edhe deri tek shkëputja e kontratës.“Nëse shënohen orët e nuk mbahen ata duhet të përballen me gjykatën se falsifikojnë gjërat , prandaj nuk është mirë që edukatorët tanë, të përballen me një çështje të tillë, se vet misioni i tyre nuk e lejon dhe është jo në përputhje me atë që e ushtrojnë në punën e tyre”, ka potencuar Berisha.
Ndryshe është bërë e ditur se vizitat për shkollat e Komunës së Ferizaj, do të vazhdojnë gjatë gjithë kohës.
Në kuadër të vizitave të rregullta që po bënë drejtoria komunale e Arsimit në Ferizaj, në një shkollë fillore janë gjetur parregullsi të shumta. Tashmë Drejtoria e Arsimit ka paraqitur vërejtjet e tyre për mësimdhënësit e asaj shkollore, por edhe për drejtorin.
