Ai ka thënë se më të veçantë e bënë fakti që ka komitete jashtëzakonisht funksionale, gjë kjo, e cila tashmë është dëshmuar në këtë legjislacion, pasiqë gjatë lëgjislacionit të kaluar me gjithë angazhimet, kishte disa vështirësi në funksionimin e këtyre komiteteve .”Si duket në këtë legjislacion kemi gjetur formulën se si do të mund të funksionojnë dhe është ngritje e këtij funksionaliteti në kuptimin e funksionimit të çështjeve se për çka janë themeluar këto komitete”, ka thënë Aliu.
Në bazë të ligjit për vetëqeverisje lokale, Kuvendi duhet t’i ketë tri grupe të komiteteve, të cilat tashmë i ka komuna e Ferizajt. Komitetet obligative janë: Komiteteti për Politikë e Financa dhe Komiteti për Komunitete. Ndërsa në kuadër të komiteteve joobligative hyjnë gjithsej katër komitete të tilla, si ai i Shëndetësisë dhe Mirëqenies Sociale, Komiteti për Arsim, ai i Zhvillimit Ekonomik si dhe Komiteti për Urbanizëm, Pronë, Gjeodezi, Kadastër dhe Mbrojtje të Mjeidsit. Në kuadër të komiteteve konsultative janë gjithsej tri komitete, ai i Barazisë Gjinore, Komiteti për Persona me Aftësi të Kufizuara dhe Komiteti i Kategorive të Dala nga Lufta.
Kryesuesi i Kuvendit Komunal të Ferizajt, Agim Aliu ka thënë se komitetet obligative, janë të obliguara që të takohen më shpesh, për shkak të peshës që kanë. ”Praktikisht takohemi para çdo mbledhjeje të Kuvendit të Komunës, mirëpo ka raste kur takohemi edhe më shpesh se sa mbledhjet e kuvendit, siç është rasti kur edhe ne duhet ta përgatisim kornizën afatmesme buxhetore, e cila është një ekskluzivitet për Komitetin për Politikë dhe Financa, që të shfletojë dhe ta shikojë dhe më pas t’i propozojë kuvendit edhe miratimin e tij. Ne shpesh edhe jemi zgjeruar si komitet dhe kemi ftuar edhe shefat e grupeve parlamentare dhe gjithëherë kjo ka dalë në funksion të një cilësie të re të dizajnimit të buxhetit, por edhe çështjeve të tjera të komunës”, ka thënë Aliu.
Ai ka thënë se edhe Komiteti i Komuniteteve është mjaft i suksesshëm dhe ka një përkrahje shumë të madhe nga mekanizmat ndërkombëtarë, në radhë të parë të OSBE-së, por edhe të CCPS-së, e cila e përkrah dhe e ndihmon mjaft shumë edhe punën e kuvendit.
Kryesuesi i Kuvendit Komunal të Ferizajt, Agim Aliu është shprehur të jetë tejet i kënaqur edhe me komitetet, që janë joobligative, të cilat funksionojnë normalisht, me përjashtim të Komitetit të Zhvillimit Ekonomik, i cili është në gjetje të një rruge të duhur për të shqyrtuar çështjet dhe për t’u konsoliduar si komitet.”Ndërsa, sa i përket komiteteve të tjera mund të them se punojnë mjaft mirë dhe çështjet të cilat i trajtojnë janë çështje që bien në domenin e tyre. Por, edhe çështjet që ne i trajtojmë si Kuvend i Komunës dhe kemi përcaktuar pika të ndryshme që lidhen me ato komitete dhe ata praktikisht i shqyrtojnë ato materiale dhe si komitete dalin me qëndrimet e tyre për çështje të caktuara. Kjo ka ndodhur në mënyrë të veçantë me Komitetin për Arsim dhe Urbanizëm, ku përfaqësues të këtyre komiteteve kanë dalë në mbledhje të kuvendit dhe kanë kumtuar ato qëndrime që kanë këto dy komitete” ka thënë i pari i Asamblesë Komunale, Agim Aliu.
Ndërsa, sa i përket grupit të tretë të komiteteve konsultative, drejtues të kuvendit thonë se kanë pasur një punë të shkëlqyer, në përjashtim të Komitetit për Barazi Gjinore, për shkak se është formuar tejet vonë. “Dy komitete të tjera, ai për Persona me Aftësi të Kufizuara dhe Komiteti për Kategoritë e Dala nga Lufta, zhvillojnë një punë të mire. Unë u jam mirënjohës të gjithë komiteteve të tjera, që po bëjnë një punë të mirë dhe gjithmonë janë në shërbim të këtyre komiteteve, për shkak se me anë të ligjit janë të përcaktuara si trupa ose si organe që ekzistojnë në kuadër të punës së Kuvendit. Komiteti i Personave me Aftësi të Kufizuara, dihet fakti se tashmë kanë paraqitur një kërkesë, një plan të veprimit që është miratuar në kuvend, i cili pritet që gjatë viteve në vijim të gjejë zbatim, normal duke pasur parasysh edhe implikimin buxhetor, sepse ne edhe kur e kemi miratuar si plan të veprimit, kemi pasur parasysh se mund të ketë implikime buxhetore” tha Aliu. Ndërsa, ka shtuar se Komiteti i Kategorive të Dala nga Lufta, zakonisht merret me organizime të ndryshme që kanë të bëjnë kryesisht me to.”Organizimet e manifestimeve që janë në bazë të datave që lidhen me këto kategori, siç janë 12 Qershori dhe 28 Shtatori -dita e dëshmorëve, por edhe ndonjë datë ndër veteranët e luftës së UCK-së për komunën e Ferizajt” ka përfunduar Aliu.
“Kuvendi i komunës së Ferizajt është njëri ndër Kuvendet më të veçanta të Republikës së Kosovës”, është shprehur kryesuesi i Kuvendit Komunal të Ferizajt, Agim Aliu.
