Këtë të mërkurë, u vu gurthemeli i ndërtimit të një çerdheje të re në qytetin e Ferizajt, donacion ky i UNICEF-it, ndërkaq që po realizohet nga firma konsulente “Organizata rinore për rrugëtim”.
Me këtë rast është vlerësuar tejet lart, ky donacion duke theksuar nevojën shumë të madhe që qyteti i Ferizajt, ka pasur për çerdhe publike. I pari i Komunës së Ferizajt, Muharrem Svarqa, më këtë rast ka thënë se ky projekt do të kushton 150 mijë euro, ndërkaq kapaciteti i kësaj çerdhe, do të jetë për 130 fëmijë në 250 metra katrorë sipërfaqe shumë e domosdoshme për fëmijët.
“Përzgjedhjen e këtij vendi për pranim e kemi bërë në bazë të vendimit që kemi marr edhe në Kuvendin e Komunës, për shkak se pikërisht ky vend do të jetë vendi i luftëtarëve, ku procedurat për ndërtimin e kësaj lagjeje kanë fillu, dhe ne mendojmë se është një vend jashtëzakonisht i rëndësishëm, sepse këtu afër është edhe shkolla fillore “Ganimete Tërbeshi”, shumë afër është edhe Qendra e Mjekësisë Familjare ish-dispanseri. Po ashtu në këtë lagje do të ketë edhe një postë, lokale afariste dhe objekte banimi që ne i kemi kushtu shumë rëndësi që në mënyrë institucionale të bëjmë zgjedhjen e banimit për të gjitha kategoritë e dala nga lufta dhe ky do të jetë edhe projekti i parë në Kosovë”, ka thënë Svarqa.
Ndërkaq përfaqësuesi i firmës konsulente Kurtesh Devaja, është shprehur mirënjohës ndaj Komunës së Ferizajt,për angazhimin në realizmin e këtij projekti madhor. Ai ka thënë se objekti i çerdhes do të jetë i gatshëm në fillim të vjeshtës dhe atëherë do të bëhet edhe përzgjedhja e stafit punues.
“Në këtë çerdhe do të vijojnë procesin edukativë arsimor 130 fëmijë dhe do të krijohen kushte për punësimin e 12 personave. Përzgjedhja e stafit do të bëhet nga komuna”, ka thënë Devaja.
U bë e ditur që stafi i cili punësohet në këtë çerdhe do të paguhet për pesë vjet radhazi nga organizata UNICEF. Objekti do të jetë i gatshëm në fillim të vjeshtës dhe do të ketë të rregulluar të gjithë infrastrukturën përcjellëse.
Këtë të mërkurë, tek ish tregu i kafshëve në Ferizaj, parcele kjo e Komunës së Ferizaj, ka filluar ndërtimi i një çerdheje të re donacion ky i organizatës UNICEF. Ndërtimi i kësaj çerdhe po bëhet tek lagjja e luftëtarëve.
