Në inaugurimin e kësaj qendre është thënë se ky projekt do të financohet nga Komisionit Evropian (KE) ndërsa implementimin e tij do ta bëjë organizata One to One Kosova, e ndihmuar edhe nga Ministria për Punë dhe Mirëqenie Sociale (MPMS) dhe komuna e Ferizajt.
Liridona Zogaj, drejtoreshë e projektit, One to One Children’s Fund, ka thënë se hapjes së kësaj qendre i ka parapri një memorandum bashkëpunimi i nënshkruar vitin e kaluar me komunën e Ferizajt, e cila edhe ka siguruar hapësirat e nevojshme për punë.
Zogaj, ka shtuar se adaptimi i hapësirave dhe regrutimi i stafit është bërë me kohë, ndërsa ka thënë se hapësira aktuale është e pamjaftueshme për zhvillimin e aktivitetit, ngase mendohet se numri i atyre që do të kërkojnë mbështetje do të jetë i madh.
Kryetari i Ferizajt, Agim Aliu, e ka vlerësuar këtë projekt, duke thënë se komuna e Ferizajt, është e përkushtuar në ofrimin e shërbimeve sa më të mira për kategoritë e tilla. Ai, ka vënë në dukje se po punohet në ngritjen e kapaciteteve dhe gjetjen e mundësive për ta avancuar këtë shërbim."Komuna, do ta shqyrtoi mundësinë e shtimit të buxhetit për mbështetjen e kësaj kategorie" ka thënë Aliu.
Përfaqësuesja e Zyrës së Bashkimit Evropian në Kosovë, Sophie Beamount, është ndier e kënaqur me punën që është bërë në ngritjen e kësaj qendre, e cila si mision do ta ketë kujdesin ndaj fëmijëve me aftësi të veçanta."Angazhimet e tilla na ndihmojnë të identifikojnë problemet e njëjta në nivel të Kosovës.
”I falënderojë edhe prindërit për përkrahje, organizaten One to One për shërbime por edhe Komunën dhe Ministrinë për përkrahje" ka thënë Beamount.
Ndërkohë edhe Qazim Gashi nga MPMS, ka thënë se ky institucion përpos ndihmave materiale ofron edhe përkrahje institucionale për këtë kategori. Ai ka thënë se kostoja e një përkujdesi është e lartë, andaj është e nevojshme që ky shërbim të kaloi në komunitet.
" Në të ardhmen mendohet që këto shërbime të blihen nga shteti, do të jetë më mirë për qeverinë, për fëmijët dhe sektorin e OJQ-ve" ka thënë Gashi, për të shtuar se aktualisht në Kosovë janë 3300 fëmijë me nevoja të veçanta.
Ndryshe, kjo qendër do të ofroj përkrahje për fëmijët me aftësi të kufizuara dhe të dhunës familjare.
Menaxherja e projektit, Klevis Vaqari, ka thënë se qëndrimi në këtë qendër, nënkupton se do të ketë seanca këshillimi me fëmijët dhe prindërit e tyre, seanca këshilluese, aktivitete psiko-sociale me grupe fëmijësh, seanca të fizioterapisë, lojëra , aktivitete të ndryshme zbavitëse, zhvillimin e ekskursioneve, kampuseve verore, vizita në familje dhe ofrimin e shërbimeve.
Mësohet se në këtë qendër janë punësuar 7 punëtorë, që do të përkujdesen për funksionimin e saj. Kjo është qendra e katërt që është hapur në Kosovë, ndërsa shumë shpejtë pritet që një e tillë të hapet edhe në Mitrovicë.
Komuna e Ferizajt, të hënën është bërë me Qendrën e Kujdesit Ditorë, e cila tani e tutje do tu ofrojë mbështetje fëmijëve me nevojë.
