Zyrtarë të Drejtorisë për Ekonomi, Financa dhe Buxhet kanë bërë të ditur se raporti mbi ecurinë financiare për këtë periudhë i është dorëzuar tashmë Kuvendit dhe se në seancën e majit pritet edhe të debatohet. Mustafë Grainca, drejtor i Drejtorisë për Ekonomi, Financa dhe Buxhet ka thënë se raportimi i ecurisë financiare bëhet konform ligjit në fuqi të financave publike. Sipas tij, gjatë kësaj periudhe janë realizuar të hyra në vlerë prej 779 263.53 euro, përfshirë edhe të hyrat nga participimi i qytetarëve. Përjashtuar këtë të fundit në realizim përfshihet vlera prej 720 981.90 euro.”Nga kjo del se plani është realizuar në masën prej 79.53 si dhe vitin paraprak për të njëjtën periudhë prej 89.42%” ka thënë Grainca.
Për më tepër mësohet se gjatë kësaj periudhe është shënuar ngritje e vlerës së inkasimit të tatimit në pronë, duke tejkaluar vitin 2012, periudhën janar-mars për 5.6%.
“Planifikimi vjetor për këtë tre mujor u realizua 47.27%.Realizimi I planit në këtë përqindje u ndikua nga fakti se viti 2013 karakterizohet me ngritje të vlerës së planifikuar për inkasim të tatimit në pronë mbi 22%, krahasuar me planin e vitit 2012, pra kjo ngritje e vlerës së parashikuar për inkasim ka bërë që kuota krahasimore në mes vlerës së realizuar dhe planit të jetë rreth 50%” ka shpjeguar Grainca.
Marrë në tersi rritja e limiteve të tatimit në pronë e kalon vlerën e 1.5 milionëve që pritet të inkasohen sivjet. Drejtori Grainca thotë se kjo përbën sfidë sepse plani është rritur për 22% krahasuar me vitin paraprak.
“Gjatë vitit të kaluar kemi inkasuar 1.2 milion euro, nga kjo që u tha del se gjatë këtij viti duhet të inkasohen 300 000 euro më shumë dhe kjo përbën atë pjesë sfiduese” ka potencuar Grainca, për të vënë në dukje se drejtoria që ai drejton lidhur me këtë edhe hartuar politika të reja për rritjen e inkasimit e të cilat po japin rezultate të pritshme.
“Bazuar në Ligjin e tatimit në pronë dhe me qëllim të rritjes së të hyrave nga ky pozicion kemi hapur qendrën e thirrjeve apo kontaktit, ku janë angazhuar dy punëtorë të cilët janë në kontakt të përhershëm me tatimpaguesit, dhe kjo po jep rezultate stimuluese dhe po rrit grumbullimin e mjeteve nga tatimi në pronë” ka thënë Mustafë Grainca
Lidhur me shpenzimet, zyrtarët thonë se gjatë kësaj periudhe komuna ka realizuar shpenzime buxhetore në masën prej 15.62% të totalit buxhetor të miratuar.”Kjo periudhë e vitit fiskal karakterizohet me vlerë të vogël të shpenzimeve buxhetore, pasi që në këtë periudhë nuk shënojmë fillimin e realizimit të projekteve kapitale për arsye të procedurave, dhe e cila kategori përmban mbi 33% të totalit të vlerës buxhetore për vitin fiskal 2013” ka nënvizuar Mustafë Grainca.
Mjetet e inkasuara nga të hyrat vetanake të komunës, orientohen për projekte kapitale të cilat për këtë vit janë të shumta dhe kanë të bëjnë kryesisht me infrastrukturën, kanalizimet dhe ujësjellësit, pa përjashtuar edhe projektet shkollore dhe shëndetësore.
Komuna e Ferizajt në tre mujorin e parë të këtij viti ka shënuar rezultatet të dukshme në inkasimin e mjeteve nga të hyrat vetanake.
