Drejtoria e Financave e Buxhetit, bëri të ditur gjatë një konference me gazetarë, me rastin e tremuajshit të parë të qeverisjes së re të Ferizajt, se gjatë kësaj periudhe janë inkuasuar mbi 364 mijë euro tatim në pronë, gjë që paraqet një rritje të dyfishuar, krahasuar me të njëjtën periudhë të vitit të kaluar.
“Kjo rritje ka ndodhur si rezultat i punës së shtuar në sektorin e tatimit në pronë dhe mobilizimit të stafit, përcaktimit të saktë të detyrave të secilit në këtë aspekt”, tha drejtoresha e financave dhe buxhetit, Lirije Syla.
Ndërsa zëdhënësi i Komunës së Ferizajt, Naim Ferati, konsideron se suksesi i inkasimit të tatimit në pronë, veç të tjerash, është shënuar edhe si rezultat i trajtimit të barabartë të tatimpaguesve.
“Nuk kemi lejuar funksionimin e lidhjeve familjare me zyrtarët e komunës, për t’iu shmangur tatimit. Ky ka qenë aspekti që nuk ka funksionuar më parë, sepse tatimin e paguanin kryesisht qytetarët e varfër, që nuk kishin mundësi të gjenin ndonjë lidhje që do t’i lironte nga tatimi”, shton zëdhënësi Ferati.
Duke raportuar për ecuritë financiare për tremujorin e parë të këtij viti, Drejtoria e Financave dhe Buxhetit e Ferizajt, theksoi se për këtë periudhë janë shpenzuar mbi 5 milion euro, ose mbi 26 për qind e buxhetit vjetor. 2 milionë e 153 mijë euro nga shuma e shpenzuar, janë dhënë për investime kapitale, ndërsa shuma tjetër është përdorë për të larë borxhet ndaj kontraktorëve, për shpenzimet e administratës etj.
Drejtoria e Financave dhe e Buxhetit theksoi gjithashtu se shkurtimi për 15 për qins i buxhetit për shërbime dhe mallra, i kërkuar nga Qeveria, ka prekur, ndër të tjera edhe drejtorinë e shëndetësisë dhe atë të arsimit.
Buxheti i Komunës së Ferizajt për këtë vit është 23 milionë e 256 mijë euro.
Komuna e Ferizajt ka dyfishuar inkasimin e tatimit në pronë gjatë tre muajve të parë të këtij viti, falë mobilizimit të Drejtorisë së Financave e Buxhetit dhe punës parimore ndaj të gjithë tatimpaguesve.
