Drejtori i Drejtorisë Komunale të Arsimit, Bashkim Hyseni, gjatë ditës së sotme ka pritur në takim kryesinë e SBASHK-ut, dega në Ferizaj. Në këtë takim, janë diskutuar një varg sfidash të arsimit ferizajas, siç janë: tejkalimi i numrit të nxënësve nëpër klasa, tejkalimi i numrit të paraleleve, mos pagesa e pagave jubilare, defektet teknike në objektet shkollore, kushtet higjieno-sanitare të shkollave, problemet me stafin teknik në shkolla si dhe shumë probleme tjera që shqetësojnë këtë fushë mjaft të rëndësishme të jetës shoqërore.
Drejtori i Arsimit, Bashkim Hyseni tha se kjo praktikë e takimeve do të vazhdohet dhe intensifikohet ditëve të ardhshme për bashkëpunim të ngushtë me secilën organizatë apo grupim profesional me qëllim që sadopak të përmirësohet gjendja në këtë sektor.
“Gjendja në arsimin ferizajas është vërtet e rëndë, janë probleme të akumuluara ndër vite dhe ne në baza ditore po angazhohemi për t’i dhënë rrugë zgjidhje. Bashkë me kryetarin Aliu kemi konsoliduar një raport bashkëpunimi me secilin mekanizëm institucional dhe joinstitucional për ta kapërcyer një gjendje të tillë dhe që këto politika të ndikojnë në rritjen e cilësisë në arsim. Secili propozim që vjen nga shoqatat e ndryshme do të shqyrtohet seriozisht nga ana jonë dhe do të marrë përgjigjen e nevojshme. Instalimi i një komunikimi të vazhdueshëm dhe transparenca është rruga e duhur për bashkëqeverisjen dhe orientimin e problematikave që ka arsimi në nivel lokal” deklaroi drejtori Hyseni.
Në anën tjetër, Rexhep Sadiku, kryetari i Sindikatës së Arsimit në Ferizaj lidhur me këtë takim deklaroi “Në këtë tre mujor po shohim një qasje krejt të re, një mentalitet të ri në Drejtorinë e Arsimit, bashkëpunim me shoqatat arsimore, sinqeritet dhe dialog i përbashkët për ecjen përpara në objektivat e ngritjes së cilësisë në arsim dhe për këtë edhe sindikata është e interesuar dhe ofron bashkëpunimin e saj. Qasja jonë është reformuese, që vërtet të angazhohemi bashkërisht për tejkalimin e sfidave dhe në këtë mënyrë të sigurojmë cilësi në arsim dhe të ardhme të sigurt për shoqërinë” theksoi kryetari i SBASHK-ut për Ferizaj, Rexhep Sadiku.
Takimet e tilla janë vazhdimësi e zotimeve programore të kryetarit Aliu dhe vizionit të qeverisjes lokale për ndërveprim institucional me qëllim rritjen e cilësisë në arsim dhe tejkalimin e sfidave në këtë sektor.
