“Hartimi i projekt buxhetit për vitin 2012-2014” ishte temë e dëgjimit të sotëm publik e cila është mbajtur në sallën e mbledhjeve të Kuvendit Komunal të Ferizajt. Me këtë rast nënkryetari i Komunës së Ferizajt, Besim Zymberi ka thënë se ide e këtij takimi nuk ishte që thjesht të mbahet një takim, por t’u përmbahen obligimeve ligjore. “Në fund të muajin gusht kur edhe do të miratohet buxheti për vitin 2012, ne do të kemi edhe informata më të sakta, se cilat do të jenë ato projekte të cilat ne do t’i zhvillojmë në vitin 2012”, ka thënë Zymberi, duke shtuar se natyrisht të gjitha ato projekte që do të zhvillohen, janë projekte që janë marrë në bashkëpunim me zyrtarët komunal dhe propozimeve të qytetarëve. Zymberi ka thënë se nga përvoja e deritanishme, konkretisht nga propozimet që vijnë nga përfaqësuesit e fshatrave dhe atyre të qytetit, ka dalur se në shkallën 90 deri në 95 për qind, propozimet e tyre janë përfillur dhe janë futur në buxhetin e vitit vijues. “Nuk kemi asnjë arsyeje të mos besojmë që edhe në vitet e ardhëshme do të jetë kështu, për arsyeje se objektivat e fshatrave dhe rajonit të qytetit përputhen edhe me objektivat që i ka komuna për realizimin e veprave infrastrukturore.
Nga ana tjetër drejtori i Drejtorisë së Ekonomisë, Financave dhe Buxhetit në Ferizaj, Mustafë Grainca, ka dhënë sqarime lidhur me hartimin e projekt buxhetin për vitin 2012-2014. Ai ka bërë të ditur se vlera e cila është e përcaktuar në bazë të kornizës afatmesme buxhetore, ka tejkaluar vlerën të cilën kanë në disponim për t’i realizur projektet. “Por buxheti i vitit 2012 do të jetë më i lartë për 3.36 për qind se sa buxheti i këtij viti, ndërsa vlera e mjeteve që do t’i kemi në dispozicion për investime kapitale për vitin 2012 ka shënuar rënje për 3.44 për qind në krahasim me këtë vit”, ka thënë Grainca, duke bërë të ditur se kjo ka ndodhur pas vendimit të qeverisë për rritje të pagave. Ndëresa qytetarët e Ferizajt të pranishëm në këtë dëgjim publik parashtruan edhe kërkesat e tyre, të cilat më shumë ishin të fokusuar në aspekte që kanë të bëjnë me zhvillimin e komunës dhe investimet që duhet bërë kryesisht në infrastrukturë, rrjet kanalizimi, ujësjellës etj. Xhemshir Ibishi nga fshati Greme lagja e Spahiajve kërkoi asfaltim rruge dhe ujësjellës. Ndërsa Sylejman Sylejmani, përveq kërkesave të tjera kishte edhe atë të ndërtimit të një ngrohtoreje për qytetin. “Nuk nxehet Ferizaji me rrymë dhe me dru. Kemi thëngjill boll. Ne duhet t’i ikim shkatrrimit të pyjeve siç po bëhet tani”, ka thënë Sylejmani. Në këtë debat nuk munguan as kërkesat për ri-instalim të rrjetit të kanalizimit fekal si dhe sistemit të ujësjellësit për rrugë dhe fshatra të qytetit. Avdi Demiri, nga fshati Talinofc ngriti problemin e ujërave të zeza në fshatin e tij. “Ai kanalizim po i’a nxin jetën qytetarëve”, ka thënë Demiri. Pas dëgjimit të qytetarëve, Zymberi dhe Grainca i’u përgjigjën qytetarëve, duke u thënë se kërkesat e tyre do të shqyrtohen një për një dhe se do të bëhet shumëçka për zgjidhjen e problemeve të tyre.Sipas nënkryetarit Besim Zymberi, zotimi i kryetarin Xhemailit ishte që deri në vitin 2013, të përmbushet cikli i infrastrukturës bazike në komunën tonë, e që sipas atij plani, asnjë fshat apo asnjë rajon në qytet të mos mbetet pa rrjet kanalizimi, të gjithë të kenë ujësjellës dhe të gjitha rrugët kryesore të jenë edhe të asfaltuara.
Këtë të premte në Ferizajt, është mbajtur dëgjimi i parë publik buxhetor i organizuar nga Kryetari i Komunës së Ferizajt, Bajrush Xhemaili.
