Këtë donacion si shumë të rëndësishëm e ka quajtur i pari i Ferizajt, Muharrem Svarqa. Ai u është mirënjohës të gjithë atyre që kontribuuan në dhurimin e këtij donacioni, i cili ju përgjigjet nevojave që kanë zjarrfikësit e Ferizajt.
“Unë shpresoj që ky donacion asnjëherë të mos përdoret dhe të ketë sa më pak zjarre, megjithatë ne do të përgatitemi që të kemi një infrastrukturë shumë të rëndësishme, sepse kemi të bëjmë me një donacion në vlerë mbi 100 mijë euro, që vjen si produkt i klubit të rotarianëve që bashkëpunojnë gjithashtu edhe me klubet tjera internacionale të rotarianëve , siç është edhe në Britaninë e Madhe”, është shprehur Svarqa, duke theksuar faktin se në këtë automjet gjenden edhe pajisje shumë të nevojshme në këtë automjet.
“ Në këtë automjet ishin edhe pajisje të shumta, siç ishin edhe disa gërshërë për intervenime tek automjete e blinduar të cilat kishin një kosto prej 20 mijë euro. Në këtë automjet edhe ne si komunë kemi kontribuar me një shumë simbolike prej 4 mijë euro, ku jemi të interesuar që të kemi edhe përfitime të tjera, sepse ne po punojmë që në një të ardhme të afërte ta funksionalizojmë edhe objektin tjetër të zjarrfikësve i cili gjendet në pjesën tjetër të qytetit”, ka thënë Svarqa.
Nga ana tjetër Peter Robinson nga rotarianët anglez, është shprehur se edhe në të ardhmen do të angazhohen që të ndihmojnë Kosovën me pajisje të tjera.
“Çdo vjet jemi munduar që të sjellim donacione të shumta në Kosovë, deri tash kemi sjell automjete për zjarrfikësit, autoambulanca, kompjuter dhe pajisje të tjera të nevojshme për spitale. Të gjitha janë donacione të ardhura nga Britani e Madhe dhe i sjellim ato për të ndihmuar ata që kanë nevojë për to”, ka thënë Robinosn, duke theksuar faktin se edhe në të ardhmen do të bëjnë përpjekje maksimale që të kontribuojnë shumë më shumë për zjarrfikësit qoftë përmes trajnimeve apo edhe formave të tjera.
Gjatë pranim dorëzimit të këtij automjeti i pranishëm ishte edhe drejtori i OSBE-së për rajonin e Gjilanit, Ulurich Biffar i cili është zotuar se këtë automjet ta pajise edhe me radio-lidhje të cilat i mungonin.
Rotary club së bashku me rotarianët britanez, Brigada e Zjarrfikësve të Ferizajt, e kanë pajisur edhe me një automjet në vlerë mbi 100 mijë euro.
