Për të inauguruar këtë projekt, morren pjesën Kryetari i Komunës së Ferizajt, Agim Aliu, Ministri i Zhvillimit Ekonomik Besim Beqaj, deputeti i Parlamentit të Republikës së Kosovës Elmi Reqica, drejtues të kompanisë “Bifurkacioni” si dhe drejtorët e Drejtorive Komunale të Ferizaj.
Me këtë rast numri një i qytetit të Ferizajt, Agim Aliu, ka theksuar se inaugurimi i këtij projekt ka një rëndësi shumë të madhe për banorët e pjesës juglindore të qytetit. “Banorët e kësaj lagje tashmë do të kenë ujin e pijshëm që deri më tani nuk e kanë pasur. Është ky projekt jashtëzakonisht i rëndësishëm për qytetarët ferizajas, për faktin se ne, në këtë fazë do të hapim, praktikisht perspektivën për fazën e dytë ku planifikojmë të përmbyllim qind për qind të gjitha pjesët urbane me rrjet të ujësjellësit, por sigurisht se faza e dytë do të zhvillohet vitin e ardhshëm. Unë me këtë rast falënderoj ministrin Beqaj dhe Qeverinë e Kosovës për mbështetjen në këtë projekt si dhe Qeverinë Zvicerane”, është shprehur Aliu, duke falënderuar të gjitha ata që kanë ndihmuar qytetin e Ferizajt.
Nga ana tjetër Ministri i Zhvillimit Ekonomik Besim Beqaj, ka thënë se ky projekt është shumë domethënës për cilësinë e jetës së qytetarëve të Ferizajt. “Qeveria është e përkushtuar që me partnerët e vet ndërkombëtarë, me këtë rast me CDC me Qeverinë zvicerane dhe me të gjithë të tjerët, me të gjitha mjetet të cilat janë në dispozicion të cilat, vinë nga taksapaguesit zvicerane dhe nga taksapaguesit e Republikës së Kosovës të shfrytëzohen, për të krijuar një jetë më të mirë për qytetarët e Kosovës. Besoj se përkushtimi i Qeverisë po shihet në baza ditore, në të gjitha projektet që neve kemi realizuar brenda këtij viti”, ka thënë Beqaj.
Ndërsa përfaqësuesi i CDC Markus Baechler është shprehur tejet i lumtur me pjesëmarrjen e tij në inaugurimin e rrjetit të ujësjellësit për banorët e lagjes “Vezir Jashari” dhe “Ali Hadri”. “Kam qenë këtu herën e fundit në maj të këtij viti dhe jam shumë i lumtur që pjesa e parë e këtij projekti sot finalizohet dhe në këtë fazë me rrjet të kanalizimit bëhen afër 500 konsumatorë të rinjë me afër 3 mijë banorë që do të furnizohen me ujë të pijshëm. Kjo ka qenë falë bashkëpunimit të shkëlqyer që kemi pasur me Komunën e Ferizajt, kompaninë “Bifurkacioni”, Ministrinë e Zhvillimit Ekonomik dhe Qeverinë zvicrane”, ka potencuar Baechler .
U bë e ditur se CDC dhe Qeveria zvicerane kompaninë “Bifurkacioni” do të ndihmojnë me një program të kontabilitetit dhe faturimit, i cili ka një rëndësi shumë të madhe për kompaninë në mënyrë që të ngritet edhe shkalla e inkasimit të faturimit .
Me këtë rast është kërkuar që të gjitha qytetarët obligimet të cilat i kanë ndaj kompanisë së ujit, t’i kryejnë në mënyrë që edhe cilësia e ujit të jetë dukshëm më e mirë.
Vlera e këtij projekti kap shumën rreth 750 mijë euro, ndërsa vlera totale e këtij projekti në të gjitha fazat që pritet të zhvillohet edhe në vitin 2013 kap shumën rreth 4.225.000 euro
Banorët e lagjes “Vezir Jashari” dhe asaj “Ali Hadri” nga dita e sotme bëhen me rrjet të ri të ujësjellësit.
