Ata prej nisjes së tyre nga objekti i komunës së Ferizajt, bënë homazhe në Kompleksin e Varrezave të Dëshmorëve në Ferizaj, për të vazhduar më pas me një homazh tjetër në Reçak, Morinë dhe Prekaz, ku më tej janë pritur edhe nga Rifat Jashari, kryefamiljar i familjes e cila dha më së shumti për lirinë të cilën po e gëzojmë sot.
Baballarët e dëshmorëve, po ashtu kanë vizituar edhe Kullën e Tahir Mehës dhe Ahmet Delisë. Më këtë rast familjarët e dëshmorëve të UÇK-së ishin tejet të kënaqur me këtë vizitë. Kryetari i Shoqatës së dëshmorëve në Ferizaj Gafurr Bytyqi është shprehur tejet falënderues ndaj kreut të komunës së Ferizajt, Bajrush Xhemailit, por edhe ndaj drejtorit të Drejtorisë së Shëndetësisë dhe Mirëqenies Sociale Bashkim Hyseni për organizimin e këtij ekskursioni.”Unë i falënderoj shumë komunën e të gjithë që organizuan këtë ekskursion për ne baballarët e dëshmorëve. Vërtet kjo është hera e parë që komuna ka bërë një organizim të tillë, thjesht na kanë nderuar”, ka thënë Bytyqi.
Nga ana tjetër edhe Drejtori i Shëndetësisë dhe Mirëqenies Sociale në Ferizaj Bashkim Hyseni ka thënë se ky është vetëm një aktivitet për të bashkuar njerëzit dhe për tu mundësuar një shëtitje simbolike dhe thjesht për t’i bërë baballarët e dëshmorëve të ndjehen mirë. ”Jam shumë i lumtur që sot e kemi kaluar një ditë të mirë dhe interesante. Kur ju ndjeheni mirë kjo na gëzon shumë edhe ne. Unë ju falënderoj juve që keni ardhur dhe jeni bashkuar në këtë ekskursion. Ne si komunë, të prirë nga kryetari Bajrush Xhemaili, do të mundohemi që çdoherë t’ju dhurojmë momente të këtij lloji, siç ishte ekskursioni i ditës së sotme”, është shprehur Hyseni.
Në Komunën e Ferizajt, janë 61 dëshmorë të Ushtrisë Çlirimtare të Kosovës.
Nën patronatin e Kryetarit të komunës së Ferizajt, Bajrush Xhemaili dhe në menaxhim të Drejtorisë së Shëndetësisë dhe Mirëqenies Sociale në Ferizaj, baballarët e dëshmorëve të Ushtrisë Çlirimtare të Kosovës, bënë një ekskursion nëpër disa vende të Kosovës.
