Simbolika e kësaj feste këtë vit e ka pasur edhe një dimension tjetër se krahas festës së tyre ky komunitet ka shënuar edhe 7 vjetorin e Pavarësisë së shtetit të Kosovës .Drejtues të Partisë Demokratike të Ashkanlive të Kosovës(PDAK) me këtë rast kanë thënë se kjo festë i bashkon ata për të qenë përkrah popullit shumicë, me të cilët siç thanë po e ndërtojnë të ardhmen e tyre, ndonëse jo edhe aq lehtë por të vendosur për të ecur drejtë prosperimit.
Kryetari i PDAK-së, njëherësh edhe deputet i Kuvendit të Kosovës, Danush Ademi, me këtë rast e ka uruar komunitetin ashkanli për festën e Flamurit dhe të Pavarësisë së Kosovës, duke u bërë thirrje që në këtë kohë të qëndrojnë unik dhe të kontribuojnë në zhvillimin e gjithmbarshëm të Kosovës.
Ai është ndalur tek situatat e fundit rreth migrimeve duke thënë se në nivel të Kosovës kanë migruar dikund rreth 1200 familje të këtij komuniteti në kërkim të një jete të mirë .Ademi, ka shtuar se bashkëkombësit e tij nuk kanë ikur nga Kosova për shkaqe të sigurisë, por për një jetë dhe mirëqenie sociale më të mirë për ta dhe familjet e tyre.
"Deklarata që janë bërë më herët se kinse ky komunitet po e lëshon Kosovën për shkaqe të sigurisë nuk qëndrojnë, ato janë deklaratat dezinformuese dhe se realiteti qëndron në atë se ky numër ka dalë për shkak të punësimit e jo për shkaqe të sigurisë", ka thënë Ademi.
Në emër të kryetarit të Ferizajt, tubimin e ashkanlive e ka përshëndetur drejtori i Drejtorisë për Kulturë, Enver Haliti, i cili në fjalën e tij ka thënë se kjo ditë nuk përkon rastësisht me datën e shpalljes së Pavarësisë së Kosovës, për këtë arsye ka thënë ai, se Ferizaj e ka futur në agjenden e saj edhe këtë festë.
"Komuniteti ashkanli i Ferizajt gjithmonë ka pasur raporte të mira me komunitetin shumicë në Ferizaj dhe ka qenë gjithherë pjesë e shtetndërtimit. Sot komuniteti ashkanli në Ferizaj gëzon shumë privilegje ku ka përfaqësuesit e vet në nivelin lokal dhe qëndror të përfaqësimit. Ne si institucione lokale zotohemi që do të punojmë sa më shumë që ky komunitet të integrohet në jetën e përditshme si në shkollim, punësim e aktivitete tjera " ka thënë Haliti.
Se ky komunitet i gëzon të gjitha të drejtat dhe jeton i lirë përkrah komunitetit shumicë shqiptar e ka pohuar edhe kryetari i degës së PDAK-së në Ferizaj, Qazim Rrahmani.
"Do të jetojmë të lirë dhe do të punojmë bashkërisht këtu. Stop emigrimit ilegal, ne jemi këtu që t’ju tregojmë të gjithëve se nuk jemi pak këtu dhe të ardhmen tonë e shohim këtu, atë do ta ndërtojmë bashkë me të gjithë", ka thënë Rrahmani.
Tubimi festiv ka vazhduar edhe me programin artistik, në të cilin nuk kanë munguar këngët dhe vallet me motive nga ky komunitet.
Qindra ashkanli janë bërë bashkë të dielen në Ferizaj për ta shënuar Ditën e Flamurit Ashkali, një festë kjo e njohur edhe si Dita e Ashkanlive, e që në Kosovë ka filluar të shënohet që 12 vite.
