Kryetari i Komunës së Ferizajt, Bajrush Xhemaili, nga afër ka vëzhguar punimet që bëheshin në asfaltimin e rrugës ‘Epopeja e Jezercit”, në Ferizaj. Me këtë rast është inauguruar edhe segmenti i parë me shtresë të asfaltit i rrugës “Epopeja e Jezercit “në Ferizaj ,rrugë kjo e cila lidh Ferizajn me Therandën. Ky është projekt dyvjeçar i komunës së Ferizajt si dhe Qeverisë së Kosovës. Numri një i qeverisë lokale të Ferizajt, Bajrush Xhemaili, ka vlerësuar lart punën që po bëhet në këtë kuadër të këtij projekti.”Ne po e kryejmë punën tonë aq sa kemi qenë të obliguar mbi bazën e një marrëveshje me qeverinë, ne po e bëjmë segmentin 1.2 kilometra që kushton 340 mijë euro. Në këtë rrugë janë kryer pesë projekte ne të njëjtën kohë si kanalizimi fekale, atmosferikë, pastaj ujësjellësi, trotuari dhe në fund asfalti”, ka thënë kryetari Xhemaili.
I pari i Ferizajt, Xhemaili, shtoi se në kuadër të 1.2 kilometërshit të rregullimit të kësaj rruge, sa i takon komunës është punuar në shumicën e pjesëve të infrastrukturës,për të vazhduar edhe në vitin e ardhshëm.”Shtresa e parë sivjet ndërsa shtresa e asfaltimit të dytë bëhet vitin tjetër ku do të bëhet edhe ndriçimi publik. Kjo rrugë është me infrastrukturë moderne”, ka potencuar Xhemaili.
Kreu i komunës së Ferizaj njëkohësisht tha se në rrugën “Epopeja e Jezercit”, është punuar ashtu edhe siç është kërkuar.” Rrugë me standarde dhe me cilësi të lartë dhe punët janë kryer në nivelin e duhur. Ne qoftë se qeveria nuk vazhdon ashtu siç ka premtuar atëherë ne do të detyrohemi që segmente -segmente ta bëjmë çdo vjet së paku deri në Nerodime , deri atje ku e kemi asfaltu rrugën para tre vjetësh”, tha Xhemaili.
Ndërsa banorët kanë qenë ata që më së shumti, kane qenë të kënaqur me realizimin e këtij projekti. Gëzim Murtezi, banor i rrugës” Epopeja e Jezercit” thotë se kjo rrugë është dashur të përfundojë qysh më parë.” Vërtetë ka qenë njëra ndër rrugët më kryesore të qytetit që është dashur të asfaltohet. Ka qenë tejet e dëmtuar, ndërsa tash është një rrugë krejtësisht tjetër” ka thënë Murtezi.
Edhe Ergjan Thaqi, banorë i kësaj rrugë ishte i kënaqur me punët që po zhvilloheshin në këtë rrugë.” Jemi shumë të kënaqur, se tashmë është rregullu kanalizimi, trotuari, rruga ka asfaltin e mirë dhe jemi shumë të kënaqur”. tha Thaqi.
Ndryshe, faza e parë e rrugës “Epopeja e Jezercit”me 1.2 km është realizuar gati se me të gjithë infrastrukturën nëntokësore dhe të tjera kurse komunës së Ferizajt ajo i ka kushtuar rreth 340 mijë euro.
Banorët e kësaj rruge janë të kënaqur me punët të cilat janë bërë në infrastrukturë në këtë rrugë.
