Të dhjetë rojtarët sa ka komuna e Ferizajt janë shprehur se prej pas luftës kanë qenë të rrezikuar dhe se tash me këto armë ndihen më të sigurt. Rojtari, Jakup Ramadani, pohon se nuk ka qenë edhe e lehtë puna në mbrojtjen e pyjeve nga fakti se ka pasur shumë rreziqe të natyrave të ndryshme."Që 14 vite punoj si rojtar, shumë herë i jemi ekspozuar rreziqeve në teren nga egërsirat, por për fat nuk kemi pasur kërcënime nga dëmtuesit. Për mendimin tim arma është e domosdoshme për punën që e bëjmë " ka thënë Ramadani.
Në anën tjetër edhe drejtori i Drejtorisë për Bujqësi dhe Pylltari, Xhemajl Reçica, është shprehur se me këtë po përmbushet edhe një synim i drejtorisë që ai drejton, pajisjen e rojës me armë, që sipas tij do tu ofroj mbrojtje fizike më të mirë. "Ky ka qenë synim i kahershëm i yni për ta funksionalizuar edhe më shumë mbrojtjen e pyjeve. Siç e dini tashmë në kuadër të masave parandaluese kemi vendosur pika kontrolli në disa zona në teren si preventivë për ta penguar prerjen. Tashmë e dimë se keqbërësit nuk janë njerëz të varfër por matrapazët që po bëjnë kontrabandë me këtë resurs të natyrës. Në suazë të kësaj së fundi e kemi ndaluar prerjen pa lejen e rojtarëve dhe kjo krejtë në funksion të parandalimit" ka thënë Reçica.
Mësohet se këta rojtarë tashmë e kanë kaluar me sukses edhe trajnimin për përdorimin e armatimit dhe se në këtë drejtim nuk do të ketë problem. Zyrtarët thonë se tashmë kanë në plan marrjen edhe të disa veprimeve tjera siç është çështja e furnizimit të qytetarëve me masën drunore për ngrohje."Do të kërkojmë nga Agjencioni i Pyjeve mundësinë që të vendosen disa pika të shitjes së druve në mënyrë që qytetarët të kenë mundësinë që legalisht të furnizohen, në të kundërtën nuk do të kemi pyje" ka thënë drejtori Xhemajl Reçica
Rojtarët e pyjeve të komunës së Ferizajt janë pajisur të enjten me armë personale të gjata, të cilat do tu hyjnë në punë gjatë kryerjes së detyrave së përditshme.
