Zëvendëskryeministrja e Kosovës, Edita Tahiri gjatë të martës ka përcjell në disa komuna rrjedhën e peticionit të nisur një ditë më parë, përmes së cilit do të kërkohet drejtësi ndërkombëtare për gratë e dhunuara gjatë luftës në Kosovë. Njëherësh ka kërkuar nga qytetarët për ta nënshkruar këtë dokument sa më masovikisht, për shkaka të rëndësisë së tij. Edita Tahiri është pritur në Ferizaj nga kreu komunal dhe gratë asambliste të Ferizajt.
"Ne kërkojmë mbështetjen e Komunës që t’u bëjë ftesë qytetarëve për ta nënshkruar në mënyrë sa më masive këtë peticion, si një akt moral dhe kombëtar. Me këtë kërkojmë drejtësi ndërkombëtare për gratë e dhunuara gjatë luftës në Kosovë. Peticioni ka qëllim që t’u japim mbështetje të fuqishme këtyre zonjave, të cilat kanë pësuar në tragjedinë e luftës së fundit në Kosovë. Të bëhemi të gjithë së bashku që t’u tregojmë atyre zonjave se jemi me to, por edhe t’i tregojmë botës së mbarë për tragjedinë që kanë përjetuar femrat në Kosovë gjatë luftës", ka theksuar Tahiri. Ajo më tej ka shtuar se ky peticion do t’i adresohet institucioneve më të larta ndërkombëtare.
"Historia jonë në luftën për liri ka krenarinë e madhe, por në këtë ka pasur edhe vuajtje të cilat edhe sot e asaj ditë ne po i përjetojmë. Ky peticion do ti drejtohet OKB-së, ku do të bëhet një raport zyrtar se çfarë ka ndodhur në luftën e Kosovës dhe si është keqtrajtuar femra, ku dhunimi i grave është përdorur si instrument lufte, fenomen i cili duhet të ndalet në gjithë botën”, ka theksuar Edita Tahiri, e cila ka falënderuar kryetarin e Ferizajt për mbështetjen e parezervë që po jep në realizimin e këtij peticioni.
Nga ana tjetër, kryetari i Komunës së Ferizajt, Muharrem Svarqa ka falënderuar zëvendëskryeministren për prezencën në Ferizaj dhe aksionin e saj të ndërmarrë për vendosjen e drejtësisë, në veçanti për gratë që kanë përjetuar dhunën sistematike dhe dhunimet gjatë luftës së fundit.
"U kam bërë thirrje të gjithë qytetarëve të Komunës së Ferizajt që sa më masovokisht ta nënshkruajnë peticionin e kërkimit të drejtësisë për femrat e dhunuara gjatë luftës. Sepse me anë të këtij peticioni ndonëse me vonesë, ne trokasim në ndërgjegjen e opinionin ndërkombëtar dhe i japim argument institucioneve ndërkombëtare për të filluar kërkimin e përgjegjësisë për krimet e ndyra që kanë ndodhur gjatë luftës në Kosovë. Me këtë peticion ne nisim fillimin e kërkimit të drejtësisë dhe synojmë nxitjen e mekanizmave të drejtësisë për të ndriçuar një çështje të rëndë, e cila deri tani kryesisht është heshtur”, tha Svarqa, duke shtuar se përmes këtij peticioni, ne bëjme një gjest të vogël por të çmuar, për të provuar që sadopak të përfillim vuajtjet e pafund të mijëra femrave kosovare që u përdhunuan egërsisht gjatë luftës këtu e 15 vjet më parë.
“Komuna e Ferizajt e mbështet me të gjitha mundësitë që ka organizimin dhe mbarëvajtjen e këtij peticioni, duke shpresuar se ai do të shërbej si një zë i fuqishëm në arenën ndërkombëtare , për të nxitur ndriçimin e së vërtetës së hidhur që ka ndodhur këtu para 15 vitesh”, ka përfunduar Svarqa.
Peticioni do të vazhdoje të mbahet deri të premten.
Zëvëndëskryemnistrja e Kosovës, Edita Tahiri gjatë të martës ka përcjell në disa komuna rrjedhën e peticionit të nisur një ditë më parë, përmes së cilit do të kërkohet drejtësi ndërkombëtare për gratë e dhunuara gjatë luftës në Kosovë.
