Kryetari i Komunës së Ferizaj, Bajrush Xhemaili ka thënë se, edhe pse nuk është obligative nënshkrimi i këtij memorandumi, obligohen për shkak të nevojave që ka komuna dhe misionit të aleancës. “Do të mundohemi që as sa mundemi t’a plotësojmë këtë memorandum, qa sa mundemi me veprimin tonë. Sigurisht që bashkëpunimi i ngushtë do të jetë ashtu siç ishte deri tani por bashkëpunimi do të jetë edhe tani për nevojat e punësimit të Kosovë, për nevojat e bizneseve e sidomos të atyre vendore”, ka thënë Xhemaili. Ndërsa sa i takon punësimit të qytetarëve, Xhemaili ka thënë se berza e punësimit, si mision ka që sa më shumë punëtorë t’i përgjigjen kërkesave të tregut me kualifikime, e aty ku nuk ka të kualifikuar, ata të aftësohen për punë.
Agim Shahini, kryetar i Aleancës Kosovare të Biznesit, duke e falënderuar kryetarin Xhemaili ka thënë se ai është shembull i mirë i zhvillimit dhe i rregullimit të infrastrukturës qoftë ajo ligjore por edhe fizike. “Kjo ne na inkurajon që të jemi më afër juve si aleancë e biznesit por edhe t’i thërrasim bizneset e tjera që të vijnë në Ferizaj, sepse mundësit për investime në Ferizaj, janë më të mira se në disa komuna të tjera”, ka thënë Shahini, duke bërë të ditur se për herë të parë do të tentohet që të realizohet projekti “Berza e punësimit Kosova 2011”, që do të mbahet me 10 maj. Qëllim i këtij projekti sipas Shahinit do të jetë, që të fton kompanitë e rajonit të Ferizajt por edhe punëkërkuesit, të cilët do të takohen në një pikë të përbashkët për të tentuar mundësitë e punësimit, trajnimit, edukimit.
E rëndësishme sipas Shahinit do të jetë, se në këtë ngjarje, me 10 maj do të evidentohen shumë punëkërkues të cilët nuk janë të evidentuar në Komunën e Ferizajt. “Kjo do të ju ndihmon që të kemi edhe një numër më të saktë se sa realisht janë të pa punë, por do të jetë edhe një mundësi tjetër, që ministria e punës ka amnistuar të gjitha kompanitë të cilat gjatë këtij muaji do t’i lajmërojnë punëtorët të cilët nuk janë të lajmëruar dhe janë në vende të punës”, ka thënë Shahini, duke apeluar që punëkërkuesit t’i përgjigjen ftesës në “Berzën e punësimit 2011”, që të gjithë së bashku t’a promovojnë tregun e punës, vlerat tona ekonomike dhe të tentohet që të zbutet numri i punëkërkuesve.
Ministria e Punës dhe Mirëqenies Sociale, do të jetë donator kryesor i këtij projekti, përmes Qendrave të Aftësimit Profesional, ku do të ofrohen mundësi të reja, që punëkërkuesit të kalojnë në faza trajnuese. Vitin e kaluar përmes “Berzës së punësimit”, u punësuan mbi 700 punëkërkues në gjithë Kosovën.
