Gjatë tre muajve të parë të këtij vitit, Drejtoria e Kulturës në Ferizaj, ka zhvilluar shumë aktivitete të rëndësishme në fusha të ndryshme. Sipas drejtorit Enver Haliti, në sferën e kulturës vlen të theksohen aktivitetet të shumta që janë zhvilluar në këtë kuadër.
“Kori profesional i Qytetit të Ferizajt mori pjesë në Festivalin tre ditor i Koreve të Femrave "A ccapello", me pjesëmarrës nga Evropa juglindore. Të gjitha koncertet u mbajtën në hollin e Shkollës së Muzikës “Prenk Jakova".Pjesëmarrja e Korit të Qytetit u përkrah dhe organizua nga DKRS. Po ashtu vlen të theksohen edhe aktivitete për shënimin e 17 shkurtit –Ditës së Pavarësisë, në plan të parë në organizim ishin stafi i DKRS-së, drejtori, udhëheqësit e sektorëve dhe njësive përkatës, stafi teknik, dhe krahas kësaj u inkuadruan edhe grupe tjera organizative dhe artistike si: teatri për fëmijë “Xixëllonjat-F”, OJQ “NA”, “Shoqata e pedagogëve të kulturës fizike”, shkollat fillore të qytetit të Ferizajt, SHAF “Zef Kolombi”, AKV “Kastriotët”, Grupi muzikor “Fëmijët e Gëzuar”, Grupi i baletit “Shpresat”, këngëtarë të Estradës ferizajase, Kori i Qytetit, Orkestra e Qytetit etj”, ka thënë drejtori Haliti.
I pari i Drejtorisë së Kulturës, Rinisë dhe Sportit në Ferizaj, Enver Haliti, në këtë kuadër e ka përfshirë edhe një donacion i cili i është bërë Korit të Qytetit, donacion ky nga KFOR-i amerikan. Ai me këtë rast ka përmdnur edhe aktivitetin që është shënuar me rastin e 8-marsit, ditës së gruas.
“Me rastin e 8 Marsit- Ditës së Gruas, Shaf Zef Kolombi, femrat piktore,organizuan një koloni artistike me karakter bamirësie. Këtë aktivitet e zbukuroi edhe prezantimi i Orkestrës së Qytetit- grupi i vajzave nën dirigjenten e Lindita Isufit. Po ashtu me rastin e 21 Marsit, ditës botërore të poezisë. Klubi Letrar De Rada-Ferizaj, në bashkëpunim me Sektorin e Kulturës, organizuan takim letrar, ku kishte mysafirë nga shumë treva shqiptare. Mysafirë special ishin grupi i shkrimtarëve "Pegasi" nga Shqipëria”, ka pohuar Haliti.
Po ashtu u bë e ditur se është mbajtur edhe një akademi përkujtimore me rastin e 14 vjetorit të vrasjes së aktores ferizajase Ardiana Abdullahu.
Në këtë konferencë u tha se sektori i rinisë gjatë tre mujorit të parë të këtij viti ka zhvilluar rreth 20 aktivitete është folur edhe
për shumë aktivitete të cilat ka zhvilluar ky sektor.
Ndërkaq sa i përket sektorit të Bibliotekës Publike “Sadik Tafarshiku”, gjatë kësaj periudhe në sektorin për fëmijë u anëtarësuan 1346 lexues me 7012 libra të lexuara kurse në sektorin për të rritur u anëtarësuan 1054 me libra të lexuara 4788.
Numri një i Drejtorisë së Kulturës, Rinisë dhe Sportit në Ferizaj, Enver Haliti, ka thënë se janë zhvilluar edhe shumë aktivitete sportive, aktivitete këto edhe që janë përkrahur nga Komuna e Ferizajt.
Përgjithësisht shikuar nga raporti i vitit paraprak dhe vitet paraprake, viti 2014 në Drejtorinë e Kulturës Rinisë dhe Sportit ka filluar me 283 mijë euro borgj në total ndaj operatorëve të ndryshëm . Nga kjo del se 151 mijë euro borgj janë trashëguar në mallra dhe shërbime, ndërsa 132 mijë euro obligime në subvencione dhe transfere ndaj klubeve të ndryshme sportive dhe shoqërive kulturoro-artistike etj.
Shikuar sipas buxhetit të miratuar nga qeveria e kaluar del se i gjithë buxheti i planifikuar për vitin 2014 është obligim ndaj operatorëve dhe klubeve. U bë e ditur se deri më tash është arritur që të zbutet edhe një numër i konsiderueshëm i obligimeve, pa penguar edhe vazhdën e aktiviteteve kulturore, rinore e sportive në qytetin e Ferizajt.
Drejtoria Komunale për Kulturë, Rini dhe Sport, gjatë tre muajve të parë të këtij viti, ka zhvilluar një varg aktivitetesh të cilat kanë qenë në interes për publikun.
