Me këtë rast kryetari i komunës së Ferizajt, Agim Aliu ka theksuar se ky takim ishte i një rëndësie shumë të madhe për shkak të asaj që shumë shpesh është folur për energjitë pozitive për talentet që ka rinia kosovare në veçanti ajo ferizajase. “Kjo tashmë nuk është diçka e brendshme, por është diçka që vërehet edhe nga jashtë dhe neve na vjen mirë që kjo është vërejtur edhe nga zotëri Dieter , pasi që ekziston edhe shkolla e futbollit në Ferizaj në krye me Fitimin”, ka thënë Aliu duke theksuar se kjo krijon një mundësi që këta talent ferizajas, kosovar të kenë mundësi që talentin e tyre ta shfaqin edhe në arenën ndërkombëtare. “Gjithsesi këta janë hapa të parë dhe ne jemi të gatshëm që t’i bëjmë këta hapa të parë, ti sinkronizojmë në mënyrë që të zbulohen këta talent dhe më vonë të barten këto përvoja edhe ne Gjermani. Ne synojmë që të kemi një takim në muajin tetor në Gjermani ku do të kemi një ftesë nga zoti Dieter edhe me kryetarin e Bonit dhe të shqyrtojmë mundësitë e bashkëpunimit në këtë fushë dhe po ashtu të krijojmë mundësi edhe ne si komunë e Ferizajt, të krijojmë terrene sportive që praktikisht të mundësohet puna me këta sportist që praktikisht janë e ardhmja jonë, jo vetëm e Ferizajt, por ndoshta jo edhe e Kosovës por edhe me larg”, është shprehur Aliu.
Ndërsa trajneri i futbollit Dieter Paffrath nga Boni i Gjermanisë, ka thënë se qëllimi i vizitës së tij në Ferizaj dhe në Kosovë është që të sheh nga afër talentet që ka Kosova në futboll. “Kam vizituar shkollën Dinamo dhe kam vërejtur se ka talent të jashtëzakonshëm dhe mendojmë që si ekipe duhet të dal jashtë dhe të bëjmë një ndeshje turne të cilën do të zhvillohet edhe mes njëri tjetrit . Ne kemi përcjellë edhe një ushtrim në klubin Dinamo dhe më ka pëlqyer jashtëzakonisht shumë ka talent shumë të mirë. Shpresoj se në të ardhmen do të jenë pjesë e ekipeve të mëdha siç është Bajerni etj”, ka thënë Paffrath.
Ndërsa, Fitim Ramadani nga departamenti i sporteve të Kosovës, ka thënë se kanë pasur shpesh takime të tilla me përfaqësues të sporteve ndërkombëtare.”Në departamentin e sportit vazhdimisht kemi pasur takime të tilla dhe kemi pasur njerëz që kanë ardhur nga vendet tjera, por nga të gjithë këta me interesuari është zotëri Dieter dhe ne shpresojmë se do të mundësojë edhe këtyre njerëzve, por edhe klubeve që të kenë mundësi që talentin e tyre ta shprehin edhe në Kosovë, por edhe jashtë Kosovës me turne të ndryshme”, ka përfunduar Ramadani.
Këtë të enjte kryetari i komunës së Ferizajt, Agim Aliu, ka pritur në një takim një trajnerin e futbolli nga qyteti i Bonit të Gjermanisë Dieter Paffrath, ku janë shqyrtuar çështja të rëndësishme sa i përket sportit.
