Në shënim të Ditës Botërore të Radios, në sheshin e qytetit në Ferizaj u organizua një aktivitet simbolik, ku u improvizua transmetimi i lajmeve drejtpërdrejt nga sheshi, duke sjellë atmosferën e një studioje radiofonike në hapësirë publike.
Aktiviteti u organizua nga Klubi i Gazetarëve “Haki Braha”, me qëllim të theksimit të rolit të radios si medium informues, edukues dhe bashkues për komunitetin. Në këtë ngjarje morën pjesë gazetarë lokalë, qytetarë si dhe përfaqësues institucionalë.
Të pranishëm ishin edhe Kryetari i Komunës së Ferizaj, Agim Aliu, si dhe drejtori i Kulturës, Rinisë dhe Sportit, Gazmend Bytyçi.
Me këtë rast, kryetari Aliu theksoi rëndësinë e radios në shoqëri dhe rolin e gazetarëve në informimin e drejtë dhe profesional të qytetarëve.
“Në Ditën Botërore të Radios, pata kënaqësinë e veçantë të bashkëbisedoj me gazetarët ferizajas në organizimin e veçantë e simbolik të Klubit të Gazetarëve ‘Haki Braha’ nga Ferizaj, ku përmes frekuencës së Radios së Qytetit urova dëgjuesit për këtë datë me vlerësimin për rolin e radios e gazetarëve dhe homazhin për gazetarët që më nuk jetojnë”, është shprehur Aliu.
Gjatë aktivitetit u rikujtua kontributi i gazetarëve ndër vite, si dhe u vlerësua rëndësia e lirisë së medias dhe informimit të saktë në një shoqëri demokratike. Organizatorët theksuan se radio mbetet një ndër format më të besueshme dhe më të qasshme të informimit, sidomos në komunitetet lokale.
Dita Botërore e Radios shënohet çdo vit më 13 shkurt, duke nderuar rolin historik dhe aktual të radios si një platformë që lidh njerëzit dhe promovon dialogun.
