Karateistja nga Ferizaj, Behije Mustafa, ka arritur një sukses të jashtëzakonshëm në arenën ndërkombëtare, duke fituar medaljen e artë në garën prestigjioze WKF Series A të mbajtur në A Coruña të Spanjës. Me një performancë mbresëlënëse, ajo zhvilloi gjithsej gjashtë luftëra, duke triumfuar në secilën prej tyre përballë një konkurrence të fortë nga mbi 83 shtete të botës.
Ky rezultat dëshmon nivelin e lartë të përgatitjes dhe përkushtimit të sportistes ferizajase, e cila vazhdon të përfaqësojë denjësisht Kosovën në skenën ndërkombëtare. Suksesi i saj është vlerësuar lart edhe nga kryetari i komunës, Agim Aliu, i cili ka përgëzuar Behije Mustafa dhe trajnerin e saj, Qëndrim Shaqiri, për arritjen e madhe që sjell krenari për qytetin e Ferizajt dhe sportin kosovar në përgjithësi.
