Dr. Ramadani diplomoi më 1984 në Fakultetin e Stomatologjisë në Beograd, u angazhua me punë në Shtëpinë e Shëndetit në Ferizaj, për të vijuar avancimin profesional edhe me specializimin në ortodonci më 2001 në Prishtinë, pa lënë anash edhe kurset e ndryshme profesionale që kreu me ekspertë të shumtë ndërkombëtar, ku edhe mori pjesë në konferenca të shumta shkencore brenda e jashtë vendit.
Përtej kësaj, Dr. Ramadani ishte bashkëthemelues dhe anëtar i Kryesisë së Shoqatës sē Mjekëve në Ferizaj për dy mandate, po kështu edhe në Shoqatën Sindikale të mjekëve ferizajas, ku ishte edhe kryetar i saj për mbi një mandat, anëtar i Trupit Koordinues të Shoqatave Sindikale në Ferizaj ku koordinoheshin veprimet kundër pushteti serb, përfaqësues i SHSSHF-së në Shoqatën Sindikale të Shëndetësisë së Kosovës, delegat i Kuvendit të Komunës dhe anëtar i KPF-së pas çlirimit, shef i repartit të stomatologjisë në QKMF më 2002-2005 ku u kompletuan me të gjitha pajisjet 10 ordinanca të reja stomatologjike, risi kompjuterike e organizative si dhe trajnime të stafit që dhanë shembull shërbimin stomatologjik të Ferizaj, të qenurit mësimdhënës në Qendrën e Kompetencës në Ferizaj, bashkëthemelues dhe anëtar i Kryesisë së Shoqatës së Ortodontëve të Kosovës, anëtar i Federatës Botërore të Ortodontëve (WFO), çka bën të aplikoj në punën e tij, teknikat më të përparuara, vlera këto të çmuara mes ferizajasve e më gjerë.
