Në ambientet e Kuvendit Komunal të Ferizaj , Rrjeti Ballkanik i Gazetarisë Hulumtuese (BIRN), ka organizuar debat të hapur për gjetjet dhe rekomandimet e Auditorit për Komunën e Ferizajt. Këto gjetje u prezantuan nga Visar Prebreza, redaktor përgjegjës i Gazetës Jeta në Kosovë.
Të pranishëm në këtë debat ishin Bujar Bajraktari nga Zyra e Auditorit të Përgjithshëm, nënkryetari i Komunës së Ferizajt Arton Gavazi, drejtorja e Financave Sebahate Ajeti-Sadiku, drejtor i Urbanizimit Lulzim Aliu, drejtori i Infrastrukturës, Arbër Bytyqi, Kryesuesja e Kuvendit të Komunës Kristina Gashi-Bytyqi si dhe përfaqësues të partive politike të përfaqësuara në Kuvendin e Komunës.
Nënkryetari i Komunës së Ferizajt, Arton Gavazi, me këtë rast ka falënderuar Zyrën Kombëtare të Audtimit për përkrahjen e vazhdueshme në përmirësimin e performancës komunale. Ai tha se Komuna e Ferizajt ka pranuar gjithsejtë 20 rekomandime dhe ka bërë përpjekje maksimale për adresimin e tyre.
Nga ana tjetër Bujar Bajraktari nga Zyra e Auditorit të Përgjithshëm, në fjalën e tij tha se takimet e tilla janë një senzibilizim për rëndësinë dhe ndikimin që kanë raportet e auditimit në përmirësimin e qeverisjes në institucionet publike dhe menaxhimin e financave publike. Ai ka thënë se gjatë vitit 2019 Komunës së Ferizajt i janë dhënë 20 rekomandime të cilat kanë qenë kryesisht në fusha të ndryshme të financave, ndërsa ka shtuar se në vitin 2018, komuna ka pasur 25 rekomandime.
Ndërkaq drejtorja e Financave Sebahate Ajeti-Sadiku, në mënyrë të detajuar ka dhënë shpjegimet e duhura sa i përket të gjeturave të Auditorit të Përgjithshëm për Komunën e Ferizajt, ndërsa është zotuar se rekomandimet e dhëna gjatë këtij vitit të kaluar, këtë vit kanë shënuar në progres.
Visar Prebreza gjatë prezantimit të analizë së raporteve të auditimit ka thënë se gjetjet më të shpeshta në komunën e Ferizajt kanë qenë në sektorë të caktuar. Ai ka theksuar se gjatë këtyre viteve në Komunën e Ferizajt janë evidentuar raste të punësimit të personave me kontrata mbi vepër, dobësi sistematike në prokurim, mungesë të dëshmive për dhënien e subvencioneve, punësim i personave me kontrata mbi vepër dhe nivel jo i kënaqshëm i zbatimit të rekomandimeve të auditimit.
