Edhe në këto ditë dimri plot acar, Drejtoria Komunale e Shëndetësisë dhe Mirëqenies Sociale ka marr rrugë për në fshatin Jezerc, që të ndihmojë banorët e këtij fshati. Sipas të parit të kësaj drejtori Bashkim Hysenit, komuna është e vetëdijshme se bëhet fjalë për një fshat që vështirë është që të punohet verës e lere më në këtë dimër të vështirë dhe të acartë. “Kemi vendos në bashkëpunim me kryetarin në këto rrethana të jashtëzakonshme që 26 familjeve t’ju dalim në ndihmë. Përzgjedhjen e familjeve e kemi bërë me përfaqësuesin e fshatit dhe praktikisht janë përzgjedhur pothuajse të gjitha familjet e këtij fshati”, tha Hyseni duke bërë të ditur se në këtë fshat jetojnë edhe shumë familje të vetmuara në thellësi të fshatit. “Vërtet e kanë të vështirë të mbijetojnë dhe ne do të përpiqemi që sa të jetë e mundur që tu dalim në ndihmë, të jemi pranë tyre me të gjitha format sa kemi kapacitet si komunë”, ka potencuar Hyseni.
26 familjet e fshatit Jezerc, janë ndihmuar me rreth 1400 kilogram miell dhe më artikujt të tjerë ushqimore në vlerë 50 euro, për çdo familje nga subvencionet e komunës.
Hysni Murati nga lagjja Zverrishte e fshatit Jezerc, që nga rënia e borës së parë ka mbetur i izoluar së bashku me familjen e tij. Ai thotë se është tejet i kënaqur edhe me ndihmat e marra nga Komuna e Ferizajt. “Jemi shumë të kënaqur për shkak se kemi qenë të bllokuar plotësisht dhe pothuajse nuk kemi pasur edhe ushqim. Kisha kërkuar edhe nga të gjithë të tjerët që të bëjnë përpjekje që të hapet edhe rruga për në lagjen Zverrishte për shkak se mund të vije edhe deri tek ndonjë sëmundje eventuale të anëtarëve të familjes sime” ka thënë Murati.
Nga ana tjetër përfaqësuesi i fshatit Jezerc Nazmi Baliu, ka thënë se do të bëjnë përpjekje maksimale që edhe këtë familje të izoluar nga bora ta ndihmojnë. “ Rrugët tjera janë të qarkullueshme, do të mundohemi që edhe këtë rrugë ta bëjmë të kalueshme për këtë familje. Përndryshe jemi të kënaqur edhe më ndihmat të cilat i ofroi Komuna e Ferizajt për banorët e fshatit Jezerc”, ka thënë Baliu.
Komuna e Ferizajt, pikërisht Drejtoria e Shëndetësisë dhe Mirëqenies Sociale më gjëra ushqimore ka ndihmuar edhe gjashtë familjet të cilat jetojnë në Burrnikut malor.
Drejtoria Komunale e Shëndetësisë dhe Mirëqenies Sociale në Ferizaj, ka ndihmuar me gjëra ushqimore banorët e fshatit Jezerc.
