Në mbledhjen e sotme të Kuvendit të Komunës në Ferizaj, këshilltarët me shumicë votash kanë miratuar propozim-vendimin për incim të krijimit të zonës ekonomike në pjesën urbane.
Drejtori i Drejtorisë së Ekonomisë, Financave dhe Buxhetit Mustafë Grainca ka theksuar se 3 hektarë të kësaj zone urbane do t;i dedikohen një investitori italian “Effegi”, kompani kjo që është e interesuar të investojë në komunën tonë mbi 17 milion euro, për realizimin e projektit për shpërndarjen e gasit. “Investitori italian ka shprehur gatishmërinë për të realizuar këtë projekt në vlerë rreth 17 milionë eurosh. Ky projekt do të jetë në favor të hapjes së 500 vendeve të reja të punës. Kompania në fjalë është mjaft serioze në ofertë, përderisa na e ka dorëzuar edhe projektin ideor, letër garancionin bankar etj.”, ka thënë Grainca.
Nga ana tjetër këshilltarët e Kuvendit të Komunës, disa kanë përkrahur këtë ide e disa të tjerë kanë qenë kundër kësaj, por në fund është miratuar ky propozim- vendim.
Në këtë mbledhje, këshilltarët komunal kanë miratuar edhe draft-rregulloren për përcaktimin e kushteve dhe kritereve për dhënien me qira të banesave në pronësi të komunës, me ç’rast kanë formuar edhe komisionin prej 11 anëtarëve.
Gjithashtu, edhe pse në shenjë mospajtimi me formën e emërimit të anëtarëve të Komisioneve komunale të aksionarëve për tri ndërmarrje publike në Ferizaj ,LDK –ja dhe AAK-ja lëshuan mbledhjen, ndërsa deputetët e pranishëm miratuan këto propozim-vendime. Njëherësh, jashtë rendit të ditës, me propozim të Grupit Parlamentar të LDK-së, Kuvendi Komunal miratoi edhe një deklaratë, përmes së cilës shprehu përkrahjen e tij lidhur me të drejtën legjitime të mëse 900 ,ish –punëtorëve të Fabrikës së Tubave në Ferizaj, e drejtë kjo e vërtetuar në të gjitha institucionet gjyqësore të Republikës së Kosovës.
Në këtë mbledhje janë diskutuar shumë çështje të rëndësishme.
