Komuna e Ferizajt ka vazhduar të subvencionojë fermerët ferizajas. Të mërkurën 25 blegtorë nga Ferizaj janë pajisur me nga një makinë mjelëse, ndërsa ditë më parë kanë qenë 30 blegtorë tjerë që kanë përfituar nga një makinë të këtij lloji, të cilat janë vlerësuar se do të jenë shumë domethënëse për ta në rrafshin e racionalizimit të punës dhe rritjes së buxhetit të tyre.
Kryetari i Ferizajt, Agim Aliu është zotuar se edhe në të ardhmen do të mbështes këtë sektor, i cili llogaritet të jetë ndër sektorët parësor të zhvillimit ekonomik.
"Kjo tregon përkushtimin tonë se do të vazhdojmë me ngritjen e sasisë së mjeteve buxhetore, ashtu siç kemi bërë gjer më tani. Për vitin 2013 kemi planifikuar 130 mijë euro mjete për mbështetje apo subvencionime të ndryshme në këtë sektor dhe sipas llogaritjeve i bie të jetë 80 për qind mjete më shumë sesa kanë qenë këtë vit" ka thënë kryetari Aliu.
Krahas ndarjes së makinave, Aliu ka thënë se po në këtë ditë është zhvilluar edhe një aktivitet tjetër në fushën e bujqësisë, i cili ka të bëjë me projektin e subvencionimit të fermerëve dhe trajnimit të tyre.
"Janë 11 fermerë ne fushën e mbjelljes së mjedrës, të cilët përveçse do të mbjellin fidanë të mjedrës prej 10-20 ari, janë trajnuar për zhvillimin e këtij sektori të bujqësisë" ka thënë kryetari Aliu, për të shtuar se do të mbështeten edhe në të ardhmen fermerët dhe kjo mbështetje do të jetë në funksion të zhvillimit ekonomik të komunës së Ferizajt.
Edhe drejtori i Drejtorisë për Bujqësi, Safit Halili ka thënë se do të ndihmohen gjithë ata fermerë që kanë nevoja të mëdha për gjallërimin e punës së tyre, ndërsa komuna do të sigurojë mjetet nga pozicioni i mbështetjes që është siguruar për ta.
"Aktualisht është duke rrjedhur procesi i trajnimit të kultivuesve të mjedrës, ndërsa shumë shpejt planifikohet edhe mbjellja e lajthisë dhe ne jemi duke kryer procedurat e nevojshme. Do të rrisin kapacitetet tona, në mënyrë që t’i ndihmojmë fermerët" ka thënë drejtori Halili.
Njëri nga ata që i është gëzuar këtij projekti ka qenë fermeri me përvojë 30- vjeçare, Agim Ramadani nga fshati Softaj. Ai ka thënë se ka mirëpritur këtë donacion.
"Në dy vitet e fundit komuna ka filluar të ndihmojë fermerët, edhe pse ne jemi në dijeni se disponon me një buxhet jo të mjaftueshëm. Unë bëj thirre që të ketë rritje të buxhetit për të pasur më shumë sukses fusha e prodhimtarisë bujqësore" ka thënë Ramadani, i cili në stallën e tij, siç ka thënë ka 33 lopë qumështore.
Zyrtarët thanë se një makinë mjelëse ka kushtuar afërsisht 350 euro.
Komuna zotohet se do të subvencionojë edhe më tej sektorin e bujqësisë
