Punëtoret e administratës komunale të Ferizajt, këshilltare komunale si dhe përfaqësuese të organizatave të ndryshme joqeveritare, me rastin e 8 marsit-Ditës ndërkombëtare të gruas kanë diskutuar për draft rregulloren për barazi gjinore.
Në hapjen e këtij diskutimi publik, Drejtori i Administratës dhe Personelit Vesel Zhinipotoku, ka theksuar se kjo rregullore është e një rëndësie shumë të madhe për shkak të asaj se parasheh trajtim të barabartë si për gratë ashtu edhe për burrat.
“Në këtë ditë kemi dashur që përmes këtij diskutimi në ditën e 8 marsit të promovojmë draft rregulloren për barazi gjinore , e cila ka kaluar edhe dëgjimin e parë në Kuvendin e Komunës. Kemi dashur që pikërisht në këtë ditë historike të të drejtës së gruas, ta promovojmë edhe bazën ligjore të një rregulloreje, që edhe ne si komunë të japim kontribut në drejtim të avancimit dhe afirmimit të të drejtave të gruas”është shprehur numri një i Drejtorisë së Administratës dhe Personelit në Ferizaj Vesel Zhinipotoku.
Ndërsa zyrtarja komunale për Barazi Gjinore, Vjollca Krasniqi, ka thënë se kjo është draft rregullorja e parë që del pas luftës.
“Draft rregullorja e parë që del pas luftës, është Rregullorja për barazi gjinore. Në harmoni të Rezolutës 13/25 dhe ligjet ndërkombëtare dhe me Kushtetutën e Republikës së Kosovës dhe konform këtyre ligjeve është hartuar kjo rregullore. Parasheh fuqizimin e femrës në të gjitha fushat e jetës”, ka thënë Krasniqi.
Në këtë diskutim publik morën pjesë edhe përfaqësues të misionit të OSBE-së në Kosovë.
U bë e ditur se kjo draft rregullore do të del edhe në Kuvendin e Komunës për t’u votuar.
Në sallën e mbledhjeve të Kuvendit Komunal të Ferizajt, gratë ferizajase kanë diskutuar për draft rregulloren për barazi gjinore.
