Para mysafirëve të pranishëm në këtë gala koncert Kryetari i Komunës së Ferizajt, Agim Aliu, ka vlerësuar tejet lartë prezencën e të gjithë përfaqësuesve këtu, por në mënyrë të veçantë edhe familjet më të vjetra ferizajase në përvjetorin jubilar të krijimit të qytetit. Aliu po ashtu ka përshëndetur dhe ka vlerësuar tejet lartë edhe përkushtimin për arritjet e Ferizajt, të kryetarëve paraardhës të Komunës pas lufte.
“Para disa ditës, në Muzeun e qytetit të Ferizajt, pamë të ekspozuar një figurë prej 7 centimetrash madhësi. Dukej paksa e gjymtuar nga klithmat e epokave. Por, ajo figurë prej 7 centimetra, me ndonjë copëz të shpërndarë rrugëve të historisë, u besua të jetë rreth 8000 vjet e vjetër. Përmasë monumentale e një copëze guri a argjile, na bëri të gjithëve të besojmë se :nga një hap i vetëm dhe sado i vogël, krijohet epoka monumentale e lindjes të një qytetërimi. Ajo figurë, sot është dekretuar solemnisht si Hyjnesha e Varoshit, e gjetur vetëm 2.5 kilometra afër qytetit të Ferizajt dhe shënon gjurmën e nisjes së qytetarisë njerëzore në trevën ferizajase”, është shprehur Kryetari Aliu, duke nënvizuar se çdo lindje është një ritual në vetë . “Doemos, ka edhe dhimbjet e saja martirizuese. Edhe lindja e qytetit të Ferizajt, këtu e 140 vjet më parë nuk ishte e lehtë. Por, kishte kulturë mija vjeçare qytetarie në themelet e saj. Një identik i tullë kulturor, sikur kishte përcaktuar fatin e qytetit të Ferizajt, në rrugën e tij të bujshme të zhvillimit e emancipimit. Ferizaj është qytetit më i ri në Kosovës. Ndoshta edhe qyteti më i ri nga qytetet e mëdha të gjeografisë natyrale shqiptare. Por, është ndjerë i sigurt në themelet e vjetra të qytetarisë së virtytshme, dinjitoze dhe të emancipuar, Pellazge, Ilire ë të Arbërit.
Ferizaj, ka sot simbole të identik, hekurudhën dhe stacionin e saj, motivues kryesor të krijimit të tij. Ka edhe simbolet identitare natyrore siç është Bifurkacioni si fenomen unikat pothuaj në botë. Ka Mullirin e Nikës, themelet e kulturës arkeologjike të paraardhësve tanë. Ka edhe gjurmët e tempujve të besimit, që kanë simbolizuar paqen njerëzore në periudha të ndryshme. Ka edhe gjurmët e rrugëve të vjetra që kanë lidhur kultura të ndryshme të përbotshme. Por, ne e dimë se Ferizajt i duhet akoma përkushtim për të përplotësuar identitetin e tij qytetar. Para dy ditësh, ne përuruam nisjen e rregullimit të Bulevardit të parë në qytet. Nuk u entuziazmuam shumë nga vlerat fizike të kësaj vepre publike. Por, duhet të jemi të entuziazmuar nga simbolika e veçantë e kësaj veproje publike. Sepse qytetit tonë, po i shtojmë bashkërisht edhe një ikonë të munguar identiteti. Natyrisht, jemi të mobilizuar dhe të motivuar drejt veprave të reja, të cilat do të rrisin cilësinë e jetës sonë dhe do ta pasurojnë shpirtin artistik ferizajas të të kuptuarit të jetës. Sot ne po ndërtojmë. Kemi orientuar energjitë e kapaciteteve të emancipimit tonë”, tha Kryetari Aliu.
Aliu, në mes tjerash ka thënë se dje Ferizaj ishte pikëtakim i tubimeve, kuvendeve e ngjarjeve të mëdha të historisë sonë kombëtare.
“Qytetarët e Ferizajt dhe trevës përreth tij, qëndruan drejt dhe asnjëherë nuk munguan në çfarëdo përpjekje për arritjen e idealeve sublime. Jo vetëm që nuk munguan , por ferizajasit, në proceset dhe etapa të ndryshme, ditën të jenë në ballë të thirrjeve për realizm të aspiratave shekullore. Ferizaj diti të jetë streha e përjetësisë për Mic Sokolin, Sefe Koshren. Diti të jete sofra e mbledhjes së burrave të mëdhenj të kombit, si, Hasan Prishtina, Isa Boletini e Bajram Curri. Ferizaj diti të jetë thirrja e kryengritjes për pavarësinë e Shqipërisë. Ferizaj diti të jete krisma e kundërshtimit të pushtetit serb, që nga viti 1912 e tutje. Ferizaj diti të jetë djep i ninullave të atdhedashurisë e qytetarisë sonë të virtytshme. Mijëra ferizajas u martirizuan në përpjekje për të ruajtur e kultivuar dashurinë për lirinë. Mijëra ferizajas u depërtuan me dhunë nga shtëpitë e tyre gjatë shekujve. Mijëra ferizajas mbijetuan dinijtitshëm plagët e betejave për lirinë. Mijëra ferizajas u terrorizuan kampeve serbe të përqendrimit.
Sot, teksa përkuleshim bashkërisht para Monumentit të Dëshmorëve mund të na ketë vajtur mendja tek figura e Hyjneshës së vjetër, Kujtuam epokat e tëra të gjakimit tonë për lirinë. Kujtuam mijëvjeçarët e përpjekjeve për të ndërtuar, kultivuar e shpërndarë virtytet e njerëzores, paqes, drejtësisë e lirisë. Dhe, kthyem kujtimin tonë 14 vjet përpara, kur në Malet e Jezrcit dhe në mbarë trevën e Ferizajt, po ndodhte beteja ndërmjet barbarisë e njerëzores, kujtuam ushtarët e Ushtrisë Çlirimtare të Kosovës, të cilët ishin trashëgimia e krijesës së bukur socioevolutive pellazgo-iliro-shqiptare në njërën anë dhe shkëputjen e rrezikshme historike, ushtrinë gjenocidiale serbe, në anën tjetër”, është shprehur Kryetari i Ferizajt Agim Aliu.
Në gala koncert morrin pjesë orkestra e Radiotelevizionit Shqiptar si dhe artisë të mirënjohur të estradës.
Aktivitetet për shënimin e 140 vjetorit të themelimit të qytetit të Ferizajt dhe 14 vjetorit të çlirimit është përmbyllur me gala koncertin në të cilin merrnin pjesë, Kryetari i Komunës së Ferizajt, Agim Aliu, zëvendëskryeministri i Republikës së Kosovës Hajredin Kuqi, Deputet të Kuvendit të Kosovës, ministra të Qeverisë së Kosovës, zëvendësministra, familje të dëshmorëve, veteranë e invalidë të luftës, veprimtare e të burgosur politik, pjesëtarë të ekzekutivit të Komunës, kryetar të komunave si dhe shumë e shumë mysafirë të tjerë
