Udhëheqja e Kuvendit të Komunës, Drejtoria e Financave dhe Drejtoria e Infrastrukturës, njoftuan qytetarët e pranishëm në diskutim për orientimet, kahet dhe synimet zhvillimore për tri vitet e ardhme, si dhe për me përparësitë e shpërndarjes së shpenzimeve buxhetore.
Ndërsa në pjesën më të madhe të kohës, qytetarët parashtruan nevojat e komuniteteve të tyre për infrastrukturë.
Qerim Hyseni, banor i Ferizajt afër Urës së Madhe, theksoi se vendbanimi i tij ka mungesë të theksuar të infrastrukturës rrugore dhe vuan për mungesë ujësjellësi, ndërkohë që rrjeti i kanalizimit, sipas tij, është ndërtuar shumë keq.
Mungesën e infrastrukturës së përshtatshme rrugore e vuri në dukje edhe Hazir Berisha nga Mirosala. Ai tha se rruga kryesore e fshatit, që e lidh Rahovicën dhe disa fshatra të tjerë me Anamoravën, nuk është riparuar për më se 30 vjet, ndërsa disa rrugë të tjera, si ajo që e lidh lagjen e Cakajva me Pojatën dhe me Sojevën, nuk po mbështeten, përkundër gatishmërisë së banorëve për të participuar.
Fehmi Ademi nga Ferizaj vuri në dukje se pushteti lokal i Ferizajt tradicionalisht vepron më aktivisht në infrastrukturë vetëm në prag të zgjedhjeve. Ai kërkoi ndërprerjen e kësaj tradite dhe krijimin e mundësisë që Komuna të financojë shpenzimiet e varrimit të qytetarëve.
Asfaltimi i një rruge në Bibaj, përpara se të ndërtohet rrjeti i ujësjellësit, u pa nga Fehmi Hyseni si veprim me radhitje të gabuar. Ai kërkoi që në këtë fshat të ndërtohet një punkt shëndetësor, një nënkalim dhe të vendosen kapakët e pusetave të kanalizimit.
Banorë të Gremes, si Sami Topalli e ndonjë tjetër, kërkuan që të rregullohet derdhja e kanalizimeve të dy fshatrave, e cila po ndot hapësira të mëdha, si dhe të përfundojnë punimet në rrugën kryesore që shpie për në këtë fshat.
Adem Sejdiu nga Gaçka qau hallin e 50 shtëpive të këtij fshati, të cilat nuk janë lidhur në kanalizim, si dhe rrtijen e kapacitetit të ujësjellësit, i cila aktualisht nuk u mjafton banorëve.
Mungesën e njërës rrjedhë të Bifurkacionit të Nerodimes, e vuri në dukje Xhemajl Ilazi dhe disa pjesëmarrës të tjerë të diskutimit. Ata kërkuan ndërhyrjen e Komunës për ta funksionalizuar këtë fenomen dhe investimet e majme që janë bërë në të.
Nazmi Sadiku nga Lloshkobarja u ankua për investime të pakëta në këtë fshat.
Ndërsa Nazim Hoxha nga Ferizaj foli për nevojën e një nënkalimi në afërsi të kompleksit të shkollave afër varrezës së qytetit, për pajisjen e shkollave me dollapë për vendosjen e librave, gjë që do ta zbuste peshën e çantave të nxënësve etj.
Nevojën e asfaltimi të dy kilometrave rrugë, nga shkolla e deri te vendi i quajtur “barraka” në Jezerc, e paraqiti një banor i këtij fshati. Ai tha se ky investim do t’i shtonte ndjeshëm mundësitë e shfrytëzimit të pasurive turistike.
Nehru Salihu nga lagjja Sherret kërkoi asfaltimin e një rruge, riparimin e rrjetit të kanalizimit, riparimin e rrugëve dytësore të lagjes dhe pengimin e hedhjes së mbeturinave në Kodrën e Gllavicës, ku qytetarët shpesh dalin për shëtitje.
Ndriçimin e udhëkryqit te Ura e Madhe në drejtim të Bibajve e kërkoi Xhafer Hetemi, Ruzhdi Musliu foli për nevojën e renovimit të rrugës së lagjes Mustafaj të Pleshinë së Ulët, ndërsa Skënder Puka shtroi nevojën e rregullimit të rrugës “Hoxhë Kadri Prishtina” në zonën e parë të qytetit. Ndërkohë, vendosjen e numrave nëpër shtëpitë e rajonit të tretë e paraqiti Ibrahim Hyseni. Ai foli edhe për nevojën e investimeve më të mëdha në turizëm.
Besim Hoxha nga Pleshina kërkoi të ndërtohet trotuari përgjatë rrugës ndërmjet Pleshinës së Epërme dhe Pleshinës së Poshtme, si dhe të vazhdohet edhe për 200 metra projekti i lagjes Kurti.
Një banor i Zaskokut tha se lagjja e Mahallës është në gjendje të mjerueshme infrastrukturore. Me ankesa të ngjashme u paraqit edhe Refik Ramadani nga Rahovica. Ai tha se Rahovica nuk është përfshirë mjaftueshëm në Kornizën afatmesme buxhetore. Më konkretisht ai kërkoi ndërtimin e kanalizimit për lagjen e Goshicëve, vendosjen e rrethojës së shkollës, mbikëqyrjen e rezervuarit të ujit etj.
Ankesa të ngjashme paraqiti edhe një banor i Mirashit. Ai kërkoi përshpejtimin e projekteve të planifikuara për këtë fshat, si dhe futjen e projektit për një rrugë harkore.
Shefqet Reka shfaqi shqetësimin e banorëve të Nerodimes së Epërme për mungesën e vazhdueshme të ujit të pijes. Ai kërkoi të gjendjet zgjidhje për një familje 11-anëtarëshe, e cila jeton në shkollën e vjetër të fshatit.
Nevoja për infrastrukturë shtruan edhe Blerim Dushica, i cili foli për nevojën e një trotuari përgjatë rrugës Pojatë e Ulët-Softaj, Bislim Mani për nevojën e përmirësimit të tensionit elektrik në rajonin e katërt, Bedri Aliu për mungesën e ujit të 50 familjeve në Nerodime të Ulët. Rrahman Zejna foli për nevojën që punkti shëndetësor në Greme të punojë me orar më të plotë, ndërsa Musli Ramadani nga Komogllava, kërkoi që në kornizën afatmesme buxhetore të futen edhe një qendër e mjekësisë familiare në këtë fshat, për trotuar trekilometërsh, për rrugë të reja etj.
Dhjetëra banorë të Komunës së Ferizajt paraqitën sot kërkesa të shumta për investime në infrastrukturën e fshatrave dhe të lagjeve të qytetit, në dëgjimin publik të kornizës afatmesme buxhetore.
