Kanë nisur në fund të javës që shkoi në Ferizaj provat e para të shfaqjes “Departamenti AP”, bashkëprodhim i teatrit “Adriana Abdullahu” të Ferizajt dhe teatrit “Skampa” nga Elbasani.
Trupa e përbashkët prej katër aktorësh, dy ferizajas dhe dy elbasanas, regjisori Adonis Filipi dhe autori i dramës, Jeton Neziraj, u pritën sot nga kreu i Komunës së Ferizajt Muharrem Svarqa, në një takim përgësues dhe inkurajues.
“Ideja e shfaqjes së përbashkët u hodh gjatë vizitës sime në mars të këtij viti në Elbasan. Bashkë me kryetarin e bashkisë së Elbasanit kishim biseduar për shumë mundësi bashkëpunimi, por kjo shfaqje është fillimi që duhet të pasohet nga projekte të tjera jo vetëm kulturore”, tha me këtë rast kryetari Svarqa.
Komuna e Ferizajt dhe Bashkia e Elbasanit marrin pjesë barabarësisht si në financimin, ashtu edhe me burime njerëzore për realizimin e shfaqjes. Regjisori Adonis Filipi tha se shpreson që ky projekt të ketë rrugëtim të gjatë, duke marrë parasysh seriozitetin e tekstit dhe investimin e përkushtimit për jetësimin e shfaqjes.
Sipas autorit jeton Neziraj, drama “Departamenti AP” flet për raportin ndërmjet individit a krijuesit me pushteti dhe për çështjen e censurimit të krijuesve. Vetë titulli asocionon me përmbajtje që flasin për kohën e agjitacionit dhe propagandës që bëhej në kohën e totalitarizmit, për t’ia mbushur mendjen publikut për pagabueshmërinë e partisë-shtet dhe ideve të saj.
Shfaqja e përbashkët e Ferizajt dhe Elbasanit pritet të marrë pjesë në festivalin ndërkombëtar “Skampa” që mbahet në Elbasan dhe në festivalin e teatrove të Kosovës që mbahet në Ferizaj.
Kanë nisur në fund të javës që shkoi në Ferizaj provat e para të shfaqjes “Departamenti AP”, bashkëprodhim i teatrit “Adriana Abdullahu” të Ferizajt dhe teatrit “Skampa” nga Elbasani.
