Kuvendi Komunal i Ferizajt ka shqyrtuar ecurinë financiare për periudhën janar-qershor të vitit 2014, e cila bazohet në arkëtimin e mjeteve nga të hyrat vetjake dhe shpenzimet e bëra në këtë periudhë. Kryetari i Ferizajt, Muharrem Svarqa ka theksuar se gjatë kësaj periudhe janë inkasuar nga të hyrat 1.6 milionë euro, përfshirë edhe të hyrat nga participimi i qytetarëve për projekte kapitale dhe grandet tjera të donatorëve, duke shënuar një rritje prej 16 për qind, apo me realizim të planit në lartësi prej 41 për qind.
"Mjetet nga tatimi në pronë arrijnë në 767 mijë euro, që nënkupton 88 për qind të realizimit të planifikimit, si dhe 21 mijë euro nga taksat e bizneseve", ka thënë Svarqa, ndërsa ka folur për stagnime në inaksimin e taksave tjera, që kanë ardhur si rezultat i uljeve të tarifave të taksave për ndërtime për metar katrorë prej 50 për qind. Duke folur për shpenzimet, kryetari i Ferizajt ka thënë se bëhet fjalë për një vlerë të kënaqshme të shpenzimeve buxhetore nga fondet burimore, në lartësi prej 12 milionë euro, që i bie të jetë shpenzuar gjysma e buxhetit në këtë periudhë. Svarqa ka siguruar këshilltarët se në fund të viti fiskal nuk do të ketë mbetje buxhetore. Ndër tjerash ka folur edhe për uljene shpenzimeve për derivate, telefoni, dreka e darka dhe mirëmbajtje të automjeteve.
Mustafë Grainca nga PDK-ja ka thënë se inkurajuese përbënë fakti që është shënuar rritje e inkasimit nga të hyrat vetjakë, pa harruar të vë në spikamë kushtëzimet që kanë ndikuar në rritje. Duke shtjelluar aspekte të buxhetit, Grainca ka folur për rrezikun nga suficiti. Muhamet Çerkini nga LDK-ja ka thënë se buxheti gjer më tani është shpenzuar me nikoqirllëk dhe këtë duke e mbështetur në lartësinë e shpenzimeve të tij prej 48 për qind, ndërsa Sylejman Zeka nga VV-ja ka shprehur brengën për shpenzimet simbolike që janë bërë në rrafshin e mbështetjes së zhvillimit ekomomik dhe sektorit të bujqësisë. Nënkryetari i komunës, Xhavit Zariqi ka vlerësuar lart punën e bërë nga kryetari dhe ekzekutivi, ndërsa është përqëndruar vështirësitë që mund të lindin në periudhën e dytë të vitit, gjatë realizimit të projekteve të ndryshme, pasi sipas tij, komuna po përballet me problemin e shlyerjes së borgjeve të trashëguara nga viti i kaluar.
Kuvendi i Ferizajt në këtë seancë është marrë edhe me çështjen e rishikimit të buxhetit, duke respektuar afatet kohore për të bërë një gjë të tillë.
Nënkryetari Zariqi ka thënë se rishikimi nënkupton bartjen e mjeteve nga projetet e përfunduara si mjete të lira, në projekte tjerë që syno t’i realizojë pushteti në të ardhmen, në një lartësi prej 556 mijë euro.
Mustafë Grainca ka vënë theksin në projektet e zhvillimit ekonomik, në 110 mijë euro që janë paraparë të destinohen për projekte tjera, duke e vënë theksin në mungesë të vullnetit të Drejtorisë për Ekonomi për mbështetje të bizneseve. Për më tepër Grainca ka thënë se rishikimi e ka gjetur tërësisht të papërgatitur ekzekutivin komunal. Ibrahim Hyseni nga AKR-ja ka potencuar se këto mjete është dashur të shpenzohen për atë qëllim që janë ndarë fillimisht dhe se Drejtoria për Ekonomi është dashur të hartojë kritere dhe mbi bazën e tyre të bëjë ndarjen. Nga ana tjetër, nënkryetari Zariqi ka theksuar se nuk do të ketë mbështjetje të bizneseve pa pasur ato ndonjë plan konkret zhvillimi, porse mjetet e destinuara do të përdoren për zhvilimin e turizmit. Rishkimi i buxhetit ka marrë dritë jeshile pothuaj me vota unanime të këshilltarëve komunal.
Kuvendi i Ferizajt i ka dhënë dritë jeshilë edhe miratimit të projektit për emërtimin e rrugëve në qytet dhe fshatra, ndërsa ka diskutuar edhe për çështjen e banesave solidare që janë ndarë në objektin afër policisë, si dhe kontestet që kanë lindur mes qytetarëve. Kryetari Svarqa ka thënë se Komuna e Ferizajt ka marrë vendim për lirimin e 30 banesave të uzurpuara, mbështetur në ligjin. Numri një i Ferizajt ka thënë se nuk do të ketë asnjë ndryshim të listës së përfituesve të banesave që ka bërë komisioni përkatës për ndarjen e banesave.
Vlerësohet lart trendi i inkasimit të të hyrave vetjake
