Rezultate në sferën e Arsimit sfidat ende të pranishme
29/07/2014 00:00
Drejtori i Drejtorisë së Arsimit, Muhamet Halili gjatë shpalosjes së punës 6 mujore ka thënë se problemet e numëruara janë ato me të cilat është marrë gjatë kësaj periudhe, në sanimin e gjendjes çfarë ishte me të marrë të mandatit.
"Përkushtim maksimal në këtë periudhë Drejtoria e Arsimit i ka kushtuar tejkalimit të problemeve të përmendura. Në rend të parë për listën e arsimtarëve, të cilët ishin jashtë sistemit të pagave dhe të gjithë mësimdhënësit të cilët kanë punuar prej muajit shtator 2013 deri në janar 2014, kanë hyrë në listën e pagave", ka thënë Halili.
Duke folur për aktivitetet tjera konkrete të bëra gjatë kësaj periudhe, ai ka veçuar disa syresh, si: takimet me aktivin e drejtorëve, Policinë e Kosovës si dhe me Prokurorinë dhe Gjykatën Themelore në Ferizaj, për sigurinë në shkolla, me ç’rast theksoi se hartuar planet operative për të vepruar në terren, ndërsa ka përmendur edhe koordinimet me shoqata për të evituar braktisjen dhe mosregjistrimin e fëmijëve në shkolla, avansimin e të drejtave të fëmijëve, organizimin e mësimit shtesë për gjithë nxënësit që kanë ngecje në mësime, mbështetjen e fëmijëve me nevoja të veçanta, formimin e asamblesë së fëmijëve, pjesëmarrjen në gara të diturisë, rezultatet e testit të arritshmërisë dhe maturës dhe tjera.
Në këtë shpalosje drejtori Halili ka numëruar edhe një mori donacionesh që kanë ardhur nga shoqata e agjencione të huaja dhe MASHT-i, të cilat kanë pasur ndikimet e tyre në mbarëvajtjen e procesit mësimor, duke përmendur me këtë rast donacionet për inventar shkollor, kompjuterë, mjete për kulturë fizike dhe tjera.
"Gjithashtu kemi fituar edhe dy donacione, për ndërtimin e një çerdheje, që do të ndërtohet nga UNICEF-i dhe projektin për rregullimin e oborrit të gjimnazit " Shaban Hashani", në vlerë prej 170 000Є ku ne kemi participuar me 17 000 €", ka thënë Halili
Por, projektet infrastrukturore që po realizon komuna, sipas drejtorit të DKA-së, janë të shumëta. Ndër tjerash ai ka veçuar: meremetimin e shkollës fillore “Jeta e Re”në Greme, rregullimin e ngrohtores në shkollën “Ismajl Qemajli”në fshatin Prelez i Jerlive, rregullimin e ngrohtores dhe depos në shkollën ”Liman Reka”në Prelez të Muhaxherëve, pastaj në shkollën "Liman Rekaj" në Surqinë, projektin e rrethojës në shkollën "Abetarja" Softaj, sallën e edukatës fizike në shkollën "Tefik Çanga", rregullimin e dritareve dhe ngrohtores në shkollën "Bilall Shala" në Lloshkobare dhe tjera.
Drejtori Halili ka thënë se në fazën e prokurimit janë edhe një mori projektesh tjera për shkolla e Ferizajt, që përfshijnë suvatime, rregullime të çative etj.
"Mendoj se në periudhën 6 mujore, Drejtoria e Arsimit në Ferizaj ka bërë një punë të arsyeshme; është përballur dhe ka tejkaluar me sukses disa nga problemet më akute dhe të ndjeshme nga pikëpamja sociale. Për ndryshime esenciale do të duhet kohë më e gjatë", ka thënë drejtori i DKA-s në Ferizaj.
Zyrtarisht është thënë se në Komunën e Ferizajt janë gjithsej 62 objekte shkollore, të të gjitha niveleve, ndërsa numri i nxënësve arrin në 28 340. Në procesin e mësimdhënies dhe pjesë e personelit janë 1904 veta.
Drejtori Halili ka thënë se sfidë në vete në periudhën e ardhshme padyshim se mbetet sistemimi i mësimdhënësve, të cilët kanë punuar prej vitesh me klasat e 13, por DKA-ja po bënë gjithçka që është e mundur për sistemimin e tyre, një proces që vlerësohet të jetë i vështirë.
Shuma e borgjeve të trashëguara në lartësi prej 354 mijë eurosh, 52 mësimdhënësit të mbetur jashtë listës së pagave, personeli i pamjaftueshëm teknik dhe administrativ, infrastruktura jo e mirë nëpër disa shkolla të ndërtuara si rrjedhojë e mos mbikëqyrjes së projekteve, kanë qenë disa nga problemet me të cilat është përballur Drejtoria e Arsimit, gjatë periudhës së parë të këtij viti.
Drejtori i Drejtorisë së Arsimit, Muhamet Halili gjatë shpalosjes së punës 6 mujore ka thënë se problemet e numëruara janë ato me të cilat është marrë gjatë kësaj periudhe, në sanimin e gjendjes çfarë ishte me të marrë të mandatit. 