Me këtë rast është thënë se jo vetëm qytetarët e Ferizajt, por edhe të Kosovës nuk kanë nevojë për shqetësime ngase situata është stabile dhe se nuk ka ndonjë shkallë të rrezikut për qytetarët.
Ministri i Shëndetësisë në Qeverinë e Kosovës, Imet Rrahmani, ka thënë se përkushtimi i autoriteteve mjekësore rreth kësaj situate është në nivelin më të lartë dhe se nuk ka nevojë për panik për shkak të rezultateve zyrtare që sot i kemi.
"Ne sot flasim me fakte janë dy raste të vërtetuara me praninë e virusit të gripit të derrave dhe që nuk flet për një mundësi të krijimit të panikës ose të mosgatishmërisë së institucioneve shëndetësore për t’i dalë në ballë çdo problematike eventuale të mundshme. Unë sot këtu u informova nga kryetari për masat e marra, jam shumë i kënaqur që përkundër vështirësive infrastrukturore ka një gatishmëri të nivelit të lartë për përballimin e situatës." ka thënë ministri Rrahmani, i cili njëherësh ka shprehur ngushëllime për humbjen e një jete nga ky virus.
Për më tepër, ministri Rrahmani, ka spikatur edhe gatishmërinë e institucioneve shëndetësore për ta përballuar ndonjë gjendje që mund të paraqitet.
"Jemi këtu që t’ju garantojmë se çdo gjë që është në kompetencë të ministrisë së Shëndetësisë dhe organeve tjera relevante është e siguruar,qoftë me barna, qoftë me gatishmërinë e personelit dhe aparaturën e nevojshme" ka thënë ministri Rrahamani.
Në anën tjetër kryetari i Ferizajt, Muharrem Svarqa, pas takimit ka thënë se shkas i kësaj vizite është identifikimi i dy pacienteve nga Ferizaj me virusin e gripit të derrit, i cili për fat të keq për njërin nga qytetarët e Ferizajt ka përfunduar me fatalitet, ndërkaq tjetri është me gjendje stabile dhe ka kaluar të gjitha vështirësitë nga simptome që ka paraqitur ky virus.
"Duke pasur parasysh obligimet që kemi për mbrojtjen e shëndetit publik që nga dje kemi pasur takime me stafin përgjegjës të shëndetësisë me të cilët kemi vlerësuar shkallën e rrezikshmërisë së qytetarëve me këtë virus. Sot kemi një fat të mirë që janë konfirmuar të gjitha ato të dhëna që janë bërë publike gjatë ditës së djeshme. Në takimin që patëm ka qenë vlerësim i përbashkët se nuk ka vend për shqetësim për qytetarët e Ferizajt për ndonjë rrezikshmëri për ndonjë pandemi apo epidemi sepse një situatë pandemike nuk ekziston askund në botë por as edhe te ne" ka thënë Svarqa.
Për më tepër, kryetari Svarqa ka vënë theksin edhe tek fakti se nga 7204 raste të dyshuar për këtë lloj gripi të gjitha kanë rezultuar negative me përjashtimet tri rasteve që dy prej tyre ishin nga qyteti i Ferizajt.
"Ne kemi vlerësuar edhe sot se virusi nuk është autokton, por ka mundësi të jetë i bartur ngase pacientet kanë lëvizur jashtë shtetit si në Maqedoni e Shqipëri. Ne do të sillemi konform situatës në parandalimin këtij gripi", ka potencuar Svarqa.
Isuf Dedushaj nga Instituti Kombëtarë i Shëndetit Publik, ka thënë se nuk ka epidemi të gripit në Kosovë dhe as në Ferizaj, duke vlerësuar se në këtë situatë nuk ka nevojë të panikës e as të mbylljes së shkollave."Është shumë normale që kur ndodh ndonjë e keqe me qenë afër qytetarëve. Më vjen keq që e ka humbur jetën një qytetar i Ferizajt. Duhet ditur se gripi është sëmundje e rëndë dhe shpeshherë përzihet me flama dhe masat mbrojtëse kundër gripit janë shumë të kufizuara për arsye se sëmundja përhapet me ajër. Vjet janë dhënë 100 mijë doza të vaksinave kundër gripit sezonal kështu që është arritur një barrier, kemi arritur atë standardin prej 10% që e kërkon Organizata Botërore e Shëndetësisë. Do të ketë raste sepse inkubacioni i gripi është shumë i vogël" ka thënë Dedushaj, i cili njëherësh i ka porositur qytetarët që të marrin masa parandaluese, si ajrosjen e hapësirave, marrjen e lëngjeve, vitaminën C dhe në rastet më të rënda të drejtohen në institucionet shëndetësore.
Ndryshe u tha se prej këtyre 7204 rasteve të lajmëruara, vetëm 20 raste janë trajtuara si të dyshuara me grip të derri, ndërsa janë diagnostifikuar me këtë virus vetëm tri raste, për fat të keq njëri ka përfunduar me fatalitet.
Një rast i vdekjes nga virusi i gripi të derrit dhe një rast tjetër i diagnostifikuar si pozitiv me këtë virus, ka ndikuar që të dielën të vizitoj Ferizajn,ministri i Shëndetësisë, Imet Rrahmani me bashkëpunëtorë dhe zyrtarë të Institutit Kombëtarë të Shëndetit Publik(IKSHP).
