Plani i veprimit për hapjen e perspektivës së përmirësimit të mirëqenies së qytetarëve të Komunës së Ferizajt, në gjendjen fillestare përfshin 14 pika, përmes realizimit të të cilave synohet zbatimi i një sërë aktivitetesh, që do të nxisnin fillimin e ndryshimeve pozitive në gjendjen ekonomike e shoqërore tek popullata.
1. Hartimi i listës së personave të papunë që nuk e kanë asnjë të punësuar në familje;
2. Postimi online i 36 planbizneseve të hartuara nga institucioni i kontraktuar prej Komunës;
3. Përgatitja e fletëpalosjeve për të 36 planbizneset, në dy faqe, me të dhënat kryesore, për nevojat e prezantimit para afaristëve;
4. Organizimi i takimeve me afaristë të komunave Ferizaj, Kaçanik, Shtime dhe Viti, për të prezantuar planbizneset dhe për të ofruar kushtet që mund t’i sigurojë Komuna;
5. Organizimi i takimeve me afaristë ferizajas në diasporë për të prezantuar planbizneset dhe për të ofruar kushtet që mund t’i sigurojë Komuna;
6. Lobimi tek institucionet financiare ndërkombëtare dhe te institucionet financiare të BE-së, për mundësinë e sigurimit të kredive të përshtatshme për investime në biznese të vogla dhe të mesme në Komunën e Ferizajt.
7. Përshpejtimi i hartimit të 50 planbizneseve të reja;
8. Kuvendi i Komunës të diskutojë sa më shpejt rrugëzgjidhjet për të dalë nga depresioni i popullatës dhe për ta zbutur numrin e të mërguarve;
9. Kuvendi dhe kryetari i Komunës t’i propozojnë qeverisë uljen për 30 për qind të pagave të të gjithë udhëheqësve të institucioneve shtetërore e publike, përfshirë presidentin, udhëheqjen e Kuvendit të Kosovës dhe të komunave, deputetët e Kuvendit të Kosovës, kryeministrin dhe të gjithë ministrat e zëvendësministrat, sekretarët e përgjithshëm të ministrive, drejtorët ose menaxherët e të gjitha ndërmarrjeve publike;
10. Të shqyrtohen mundësitë që të merren masa kursimi në të gjitha pozicionet buxhetore, ndërsa nga paratë e kursyera të formohet fondi për zhvillim ekonomik i Komunës së Ferizajt.
11. Urgjentisht të shqyrtohen të gjitha masat stimuluese që mund t’i zbatojë Komuna në raport me bizneset që hapin vende të reja pune. Të caktohet një çmim si shpërblim për çdo vend të hapur pune, ose Komuna të marrë përsipër pagesën për gjashtë muajt e parë të një page mesatare për njëmijë të punësuar gjatë këtij viti.
12. Të bëhet kujdes gjatë hartimit të buxhetit për vitin e ardhshëm që fondit zhvillimor t’i jepet rëndësi më e madhe se sa ndërtimeve të infrastrukturës.
13. Komuna të publikojë të gjitha hapësirat publike, ku mund të vendosen bizneset e reja, ose të përshpejtojë rregullimin e hapësirave që mund të shërbejnë si zona të ardhshme ekonomike.
14. Të përgatitet dhe të zbatohet një fushate mediatike për (pa)mundësinë e sigurimit të strehimit ekonomik në vendet perëndimore.
Kryetari i Komunës së Ferizajt konsideron se situata ekonomike dhe shoqërore është shumë serioze, prandaj edhe pushteti lokal dhe ai qendror duhet të jenë serioz dhe të bëjnë gjithçka që është e mundur për ta përballuar këtë gjendje.
Plani i propozuar nga kryetari i Ferizajt pret të pasurohet edhe më tej me propozimet e Kuvendit të Komunës, anëtarëve të qeverisë lokale, të qytetarëve, shoqërisë civile, mediave, ekspertëve dhe të gjithë të interesuarve, për të formësuar një plan sa më gjithëpërfshirës dhe të realizueshëm, sepse aktualiteti shoqëror, politik dhe ekonomik nëpër të cilin po kalojmë, nuk mund të marrë kahun e ndryshimeve të shpejta pa mbështetjen e të gjitha ngjyrimeve politike, intelektualëve, ekspertëve dhe të qytetarëve. Plani do të duhej të marrë formën përfundimtare brenda muajit mars.
Zyra e kryetarit të Ferizajt
Muharrem Svarqa
Kryetari i Komunës së Ferizajt, Muharrem Svarqa, ka përgatitur që në dhjetor të vitit të kaluar një dokument, si propozim masash e veprimesh për hapjen e perspektivës së përmirësimit të mirëqenies së qytetarëve të Komunës së Ferizajt. Dokumenti, një pjesë e të cilit ka filluar së realizuari gjatë dhjetorit, janarit dhe shkurtit, është plotësuar këto ditë dhe pritet të diskutohet në Kuvendin e Komunës, me grupet e ekspertëve, me qytetarët, shoqërinë civile dhe me mediat.
