Në hapjen e kësaj konference, kryetari i komunës së Ferizajt, Muharrem Svarqa është shprehur se vendet e BE-së kanë investuar në regjionin e lindjes në shumë projekte që janë vitale për përmirësimin e jetës së qytetarëve, duke shfaqur shpresën se këtë ndihmë do ta kemi edhe në të ardhmen.
“Po ashtu Be ka financuar një numër të konsiderueshëm të kompanive përmes skemës se granateve rurale si dhe është duke mbështetur financiarisht bizneset mikro, të vogla dhe të mesme. Të gjitha këto programe kontribuojnë në përmirësimin e gjendjes së përgjithshme socio-ekonomike përfshirë bizneset, në zhvillimin e sektorit privat dhe krijojnë kushte të favorshme për zhvillimi të qëndrueshëm te sektori privat dhe kanë ndikim direkt në jetën dhe mirëqenien e të gjitha komuniteteve të cilat jetojnë në rajonin lindje”, është shprehur kryetari Svarqa.
Mbështetje programeve rajonale i ka dhënë edhe ministrja e Tregtisë dhe Industrisë, Hikmete Bajrami.
Nga ana tjetër shefi për bashkëpunimit në Zyrën e BE-së në Kosovë, Christof Stock, është shprehur i lumtur që është arritur të organizohet kjo konferencë regjionale me qëllim të prezantimit para donatorëve të projekteve kryesisht në infrastrukturë dhe agrobujqësi.
Ai tha sa Komunat duhet të punojnë në projekte të përbashkëta, siç bie fjala për projektin e lumit “Morava” që prekë 6 komuna të lindjes si dhe projekte të tjera që do t’ua bënin jetën më të mirë qytetarëve.
Ndërkaq zëvendësministri i integrimeve evropiane Ramdan Ilazi është shprehur se Ministria e Integrimit Evropian, e ka përkrahur një iniciativë të tillë, dhe do të angazhohet që niveli qendror i qeverisjes të përfshihet më tepër në iniciativat që kanë për synim të ndihmojnë autoritetet lokale në bashkëpunimin ndërmjet tyre, me qëllim të rritjes së kapaciteteve për absorbim të fondeve të donatorëve.
“Qeveria e Kosovës së fundi ka miratuar programin e saj qeverisës, që paraqet prioritetet për zhvillim në katër vitet e ardhshme. Qeveria po ashtu, do ta finalizoj së shpejti, brenda disa muajsh, Strategjinë Kombëtare për Zhvillim dhe kjo e fundit do të jetë referenca kryesore e jona për të koordinuar buxhetin kombëtarë dhe fondet e jashtme”, është shprehur Ilazi.
Përkrahje kësaj konference i ka dhënë zëvendësministri i MAPL-së, Bajram Gecaj.
Në konferencën me donatorë, kryetari i komunës së Ferizajt, ka prezantuar projektin për rregullimin e hekurudhës së qytetit të Ferizajt, projekt ky që kap shumën rreth 19,000,000 euro.
Pas përfundimit të prezantimit të projekteve kryesisht në agrobujqësi dhe infrastrukturë nga ana e 11 Komunave të Lindjes, kryetari i Komunës së Gjilanit Lutfi Haziri ka thënë se mbajtja e konferencës së donatorëve është ditë e shpresës së madhe për këtë regjion.
“Kjo konferencë me donatorë është kulmim i një angazhimi të përbashkët ndër-komunal me komunat e këtij regjioni. Ne kemi arritur që të paraqesim projektet kryesore, çdo komunë nga katër programe, ndërsa nga një është prezantuar para donatorëve. Sot kishim donatorë të fuqishëm, është Komisioni Europian i cili bartë të gjithë buxhetin e shteteve të BE – së, zyra në Prishtinë, edhe sa i përket programit IPA II, është një shancë e mirë për investime në kuadër të vërshimeve në Ballkanin Perëndimor”, është shprehur kryetari Haziri në përfundim të kësaj konference.
Nën organizimin e Asociacionit të Agjencive për Zhvillim Rajonal (ARDA) në bashkëpunim me Asociacionin e Komunave të Kosovës (AKK) dhe në partneritet me Ministrinë e Integrimeve Evropiane, është mbajtur në Gjilan, konferenca e donatorëve mbi zhvillimin socio-ekonomik për rajonin e lindjes, në të cilën mori pjesë kryetari i komunës së Ferizajt, Muharrem Svarqa njëherësh kryesues i Bordit të AZHR-lindje, drejtoresha e zhvillimit ekonomik dhe turizmit në komunën e Ferizajt, Mimoza Fazliu, Christof Stock shef i bashkëpunimit në Zyrës së BE-së në Kosovë, ministrja e Tregtisë dhe Industrisë, Hikmete Bajrami, zëvendësministri i Integrimeve Europiane, Ramadani Ilazi dhe ai i MAPL-së, Bajram Gecaj, Naim Ismajli kryetar i Asociacionit të Komunave të Kosovës si dhe kryetar të tjerë të 11 komunave të regjionit lindje si dhe donatorë të fuqishëm siç është Komisioni Europian e të tjerë.
