Këtë të martë në Ferizaj, u mbajt një takim më përpunuesit e drurit për tu njoftuar në detaje lidhur me hapjen e një qendreje për përpunuesit e drurit. Siç tha drejtoresha e organizatës CDF, bashkëimplementuese e këtij projekti, përpunuesve të drurit nga Ferizaj, Kaçaniku e Shtërpca do t’u ofrohen shërbime të makinës CNC, trajnime për shkathtësi të përgjithshme menaxheriale, menaxhim të resurseve, marketing, shitje dhe standardizim.
10 përpunues të drurit do të certifikohen edhe me standarde ISO të kualitetit si dhe të marrin pjesë në panaire ndërkombëtare, duke rritur kështu edhe mundësinë e eksportit të produkteve.
E, komuna e Ferizajt, për ndërtimin e qendrës do të ndajë një parcelë në fshatin Greme të Ferizajt. Kryetari i Komunës, Muharrem Svarqa tha se kanë zgjedhur Gremen, sepse aty janë të vendosura bizneset më të suksesshme të përpunimit të drurit.
“Disa nga mobilet që ne i kemi janë nga bizneset e fshatit Greme , që flet për një kualitete shumë të rëndësishëm, që flet për një dizajn shumë të rëndësishëm për këtë veprimtari, dhe sigurisht ne si komunë jemi shumë përfitues të këtij projekti, për shkak se kemi shpreh gatishmërinë tonë që të sigurojmë pasurinë tonë të patundshme, sipërfaqe të mjaftueshme ashtu siç i ka kërku projekti i Bashkimi Evropian dhe atje ku janë të koncentruara bizneset ne ta bëjmë kështu vendosjen e realizimit të këtij projekti. Pjesa ma e madhe e bizneseve për përpunimin e drurit janë në Greme dhe interesimi ynë është që përmes procedurave të Kuvendit ta shpallim një zonë të interesit pikërisht në Greme, sepse ky projekt kap shumën 550 mijë euro, ne kemi një participim 50 mijë euro në këtë projekt dhe participojmë me lokacionin se ku do ta vendosim”, ka thënë kryetari Svarqa.
Ai me tej ka shtuar se e rëndësishme është se makinat të cilat do të jenë janë shumë të kushtueshme dhe nuk ka mundësi që secili përpunues i drurit t’i ketë ato, por të gjithë do t’i shfrytëzojnë ato në mënyrë të ndryshme atë teknologjinë e re dhe këtë do ta shfrytëzojnë të gjithë përfituesit që merren me përpunimin e drurit.
“Përftimet më të mëdha përpos këtij objekti brenda realizimit të këtij projekti parashihet edhe certifikimi me ISO standard të 10 bizneseve, të cilat do të jene biznese që do të përfaqësohen në panairet ndërkombëtare që është obligim i ynë që produktetet tona t’i plasojmë edhe jashtë vendi”, është shprehur kryetari Svarqa.
Enver Krasniqi bashkërealizues i projektit “Rritja e konkurrueshmërisë, kualitetit të prodhimit dhe shitjeve të përpunuesve të drurit” konsideroi se ky projekt është nga më të qëndrueshmit në Kosovë.
Nga ana tjetri drejtori i zhvilimit ekonomik në Ferizaj, Enver Haliti tha se Ferizaj e ka primatin e prodhimtarisë së mobilieve dhe se do të mbështesin bizneset, në mënyrë që shtohen edhe vendet e reja të punës.
Në komunën e Ferizajt mësohet se janë aktivë 170 prodhues të mobilieve. Për të përfituar nga projekti i Bashkimit Evropian ata do të mund të aplikojnë deri më datën 30 prill të këtij viti.
Përpunues të drurit nga komuna e Ferizajt u mblodhën për të mësuar detaje nga një projekt i Komisionit Evropian, nëpërmjet të cilit synohet të hapet një qendër e përpunuesve të drurit në Ferizaj.
