Banorët e fshatit Koshare të Ferizajt iu gëzuan fillimit të ndërtimit të një nënkalimi i cili lidh dy pjesët e fshatit dhe mbron nxënësit që duhet të kalojnë rrugën për në shkollë.
Kryetari i komunës së Ferizajt Muharrem Svarqa me këtë rast tha se ky element infrastrukturor do të jetë shumë i rëndësishëm për gjithë komunitetin. Ndërsa investimet e tilla nga Ministria e Infrastrukturës u tha se janë fillimi i investimeve të munguara deri më tani.
“Këto investime që po bëhen në këtë fshat janë të vonuara dhe kjo po bëhet vetëm pas takimit që kemi pasur me ministrin e Infrastrukturës Lutfi Zharku, i cili premtoi që në qytetin e Ferizajt do të ketë investime shumë më të mëdha. Ky projekt është shumë i rëndësishëm për banorët e këtij fshati me vet faktin se në këtë rrugë ka qarkullim të madh të automjeteve dhe këtu afër është edhe shkolla ku nxënësve ju bie që çdo ditë të kalojnë këtë rrugë”, ka thënë kryetari Svarqa.
Ndërsa Hajrullah Hajra nga kompania punëkryerëse “Eurokod” nga Prishtina zotohet se për rreth 60 ditë do ky projekti do të përfundojë.
“Do të punojmë me një përkushtim të madh dhe besoj se nënkalimi do të jetë më standarde dhe do të jetë shumë i qarkullueshëm për banorët e fshatit.
Edhe banorët e fshatit Koshare këtë projekt e kanë pritur mjaft mirë. Ata thanë se kanë pasur probleme nga më të ndryshmet për shkak të rrezikut të përhershëm që ju shkaktohej sidomos fëmijëve nga veturat e shumta.
Fshati Koshare i Ferizajt konsiderohet se është pjesërisht i kompletuar me infrastrukturën e nevojshme duke përmendur më së shumti nevojën për më shumë ujë nga krojet e tyre. Vlera e këtij projekti kap shumën mbi 83 mijë euro.
Në fshatin Koshare të komunës së Ferizajt, këtë të mërkurë filluan punimet për rregullimin e një nënkalimi në këtë fshat.
