Me këtë rast është thënë se shifra flasin për një dukuri që ka marrë përmasa shqetësuese në shoqëri, roli i së cilës është i pakontestueshëm në parandalimin e tyre. Fillimisht drejtori i Drejtorisë Rajonale të Policisë së Ferizajt, nënkolonel Gazmend Hoxha, në cilësinë e nikoqirit të këtij takimi ka thënë se bazuar në statistikat që disponon policia, këto raste janë shpeshtuar jo vetëm në regjionin e Ferizajt por edhe në nivel vendi. Hoxha, ka shtuar se ky fenomen para luftë nuk ka qenë aq shumë i theksuar dhe shqetësues se sa është tash.
"Policia e Kosovës e vetme këtë lloj fenomeni nuk mund ta luftoj sepse ne po mendojmë qe hallka apo zingjiri i institucioneve që është dashur të merren me fenomenin e vrasjeve apo trajtimin e viktimave të tentim vetëvrasjeve po mungon lidhja zingjirore. Është vetëm një hallkë, policia po merret me to mirëpo po mungon qasja zingjirore e trajtimit të viktimave të rasteve të tilla. Andaj mendojmë se një qasje gjithëpërfshirëse e trajtimit të këtyre individëve duhet të intensifikohet dhe po ashtu një debat më i gjer duhet të bëhet brenda shoqërisë", theksoi Hoxha.
Edhe kryetari i Ferizajt, Muharrem Svarqa, lidhur me këtë problematikë ka vlerësuar se kështu po hapet një debat i rëndësishëm me qëllim të parandalimit të kësaj dukurie e cila për fat të keq ka marrë përmasa shqetësuese në Kosovë. Ai ka folur për pasojat që mund të kenë për shoqërinë këto raste, ndërsa ka bërë thirrje për një unitet gjithpërfshirë me qëllim të sensibilizimit të opinionit, në mënyrë që të merren masa në ngritjen e këshillimoreve që merren me këtë çështje por edhe këshilluesit e kësaj çështje të dalin në teren për shkak se ka një hezitim që njerëzit që kanë probleme të kësaj natyre rrallë herë marrin guximin për ta vizituar mjekun.
"Në perëndim kjo nuk është problem, ndërsa te ne nuk e kemi guximin që të përballemi me shqetësimet që paraqiten edhe për shkak të rrethit dhe ambientit që nuk e trajton mirë atë njeri i cili ka nevojë për një ndihmë nga institucionet përkatëse që mund të ndikojnë drejtpërdrejt në ndihmën e shërimit mendor ose perceptimit për përballimin e problemeve me të cilat përballet një individ i caktuar. Sado që duket që akti i vetëvrasjes është një akt personal megjithatë duhet të jetë një nga brengat shoqërore", ka nënvizuar Svarqa, për të shtuar se akoma nuk janë ndërmarr të gjitha masat që shkollat tona të kenë organet profesionale si psikolog, pedagog dhe organe këshilluese profesionale.
Bazuar në statistikat e prezantuara nga zv/drejtori i DRP-së të Ferizajt, Basri Shabani, ka dalë se në rajonin e Ferizajt vetëvrasje më së shumti ka pasur gjatë vitit 2012, ku janë shënuar 12 raste të tilla, ndërsa sipas gjinisë nga numri i përgjithshëm i vetëvrasjeve, 59 raste i takojnë gjinisë mashkullore, ndërsa 14 raste gjinisë femrore.
"Te rastet e tentim vetëvrasjeve kjo statistikë do të ndryshoj, do të thotë është e kundërta e të parës, ku ka rritje të dukshme të këtyre rasteve nga gjinia femërore", ka thënë Shabani. Në debat morën pjesë edhe njohësit e kësaj problemetike. Njëri ndër ta, profesori i sociologjisë, Ismajl Hasani, ka thënë se ky fenomen nuk e kursen asnjë shoqëri dhe vije si rezultat i mungesës së përkujdesit shpirtëror. Ai ka cituar me këtë rast një thënie të Dyrkemit se" vetëvrasja nuk është shëmti shoqërore por është një akt shoqëror", ndërsa është angazhuar kundër tendencës së stigmatizimit të personave të cilët tentojnë të bëjnë vetëvrasje."Vëmendje t’i kushtohet rasteve recidiviste e jo rasteve të kryera" ka shtuar Hasani, teksa ka përmendur edhe tipet e vetëvrasjeve duke u ndalur veçmas tek tipi altruistik i vetëvrasjeve, që sipas tij gjenezën e ka në lashtësi dhe personat që vendosin të flijohen këtë e bëjnë për një qëllim të lartë, shpirtërore, fetare apo doktrinare.
"Ky tip sot është aktual dhe fatkeqësisht di të prodhoj pasoja për familjen dhe shoqërinë, ngase vetëflijohet në emër të qëllimeve të larta", ka thënë Hasani. Kontribut në këtë aspekt kanë dhënë edhe përfaqësuesit e bashkësive fetare, ndërsa neuropsikiatri dr.Bahri Goga, ka sjellë shkaqet që më së shpeshti i nxisin njerëzit të kryejnë akte të tilla. Në fund të kësaj tryeze kanë dalur edhe rekomandimet të cilat do të jenë si pikënisje në rrugën për ta luftuar këtë dukuri devijuese të shoqërisë.
Prej pas luftës në rajonin e Ferizajt janë shënuar 81 raste të vetëvrasjeve dhe 356 raste të tentim vetëvrasjeve,është thënë të enjten në tryezën e organizuar nga Drejtoria Rajonale e Policisë në Ferizaj, e ku morën pjesë edhe përfaqësues të institucioneve tjera relevante por edhe njohës të kësaj problematike
