Në Ferizaj është përkujtuar me pietet Heroi i Kombit, Rexhep Bislimi, njëri nga themeluesit e Ushtrisë Çlirimtare të Kosovës (UÇK) në rajonin e Ferizajt në 17 vjetorin e rënies së tij.
Familjarë, bashkëveprimtarë e përfaqësues të institucioneve lokale e qendrore dhe qytetarë të Ferizajt kanë vendosur lule në shtatoren e komandantit në sheshin e qytetit, ndërsa ceremonia e homazheve është zhvilluar në Varrezat e Dëshmorëve.
Për figurën e gjeneral Rexhep Bislimit është folur në një akademi, mbajtur nën patronatin e kryetarit të Ferizajt, Muharrem Svarqa.
Numri një i qytetit të Ferizajt Muharrem Svarqa ka thënë se Rexhep Bislimi, është ekzempari më ilustrues i makinerisë së dhunës që punonte pamëshirshëm natë e ditë, për ta mbajtur nën sundim këtë vend e këtë popull, po aq sa është ilustrues edhe për kundërshtimin me forcë të robërisë dhe gjithë të ligave që sjell ajo, deri në flijim.
"Së këndejmi, figura e Rexhep Bislimit është thadruar në ndërgjegjen tonë si model i shkëlqyer i vetëmohimit dhe gatishmërisë për të sakrifikuar gjithçka që ka njeriu, në emër të një ideali shumë domethënës e shumëdimensional, të nevojshëm sa buka, uji e ajri: liria e një populli. Rexhep Bislimi është ngulitur në kujtesën tonë si modeli i njeriut që merr mbi vete përgjegjësinë për të organizuar dhe kryer vepra të mëdha në kohë të rënda e të rrezikshme, pa marrë parasysh çmimin, i vetëdijshëm se nuk ka çmim që nuk duhet paguar, për të ecur drejt njërit nga idealet më madhështore që ka ndërgjegjja e njeriut", ka thënë Svarqa, për të vlerësuar se Ferizaj dhe Kosova ka për të folur përgjatë dekadave e shekujve për veprën dhe shembëlltyrën e Rexhep Bislimit dhe heronjve të tjerë, duke përplotësuar, analizuar e studiuar aspekte nga rrezatimi i veprimtarisë së tyre.
“Por brezat e tashëm dhe të ardhshëm, në biografinë e Rexhep Bislimit, përpos madhështisë së përpjekjeve dhe idealeve të tij, kanë për të folur edhe rreth përmasave të skëterrshme të mizorive që ka ushtruar regjimi i Milosheviqit, mbi çdo nismë për çlirim nga dhuna, terrori e poshtërimi që po ushtrohej pamëshirshëm ndaj shqiptarëve në Ferizaj e kudo në Kosovë gjatë viteve ’90 të shekullit të kaluar.
Ferizaj dhe Kosova e kanë përjetësuar Rexhep Bislimin në kujtesën individuale e kolektive të brezave, duke i dhënë titullin më të lartë: Hero i Kosovës dhe duke emërtuar rrugë me emrin e tij. Por, përjetësimi më i vlefshëm i veprës së Rexhep Bislimit, i veprës së heronjve dhe dëshmorëve, bëhet duke e ndërtuar vendin tonë si një mjedis të lirë, demokratik e të zhvilluar, në të cilin çdo qytetar të ndihet i lirë ta japë kontributin e vet zhvillimor dhe të bëjë jetë të dinjitetshme. Besoj fuqishëm që ferizajasit do të arrijnë që me angazhime serioze, në të gjitha fushat e jetës, të tregojnë aftësi, kurajo dhe përkushtim, për ta çuar komunën e tyre drejt përparimit, zhvillimit, demokracisë dhe ngritjes së mirëqenies për të gjithë. Me heronj si Rexhep Bislimi, ferizajasit do të ndihen të nderuar e krenarë për jetë të jetëve”, ka përfunduar kryetari Svarqa.
Deputeti i Kuvendit të Kosovës, Nait Hasani është përqendruar në fjalën e tij në momente të veçanta rreth bashkëveprimit me heroin si dhe në zhvillimet aktuale në vend, me theks të veçantë rreth formimit të Gjykatës Speciale.
"Sot kanë kaluar mbi 19 vite që kur kam njohur Rexhep Bislimin. Ato ditë i kujtoj edhe sot sepse ishin ditë të rritës sonë. E takova në këtë qytet, e pashë në çdo rrugë, në çdo lagje dhe i gatshëm të përballet me sfidat e jetës dhe çështjet e Kosovës. E gjeta dhe ishte i gatshëm ta marrë përgjegjësinë e organizimit të luftës, të luftojë për çlirimin e Kosovës nga Serbia. Ishte i gatshëm të lufton dhe të bie për Kosovën", ka thënë Hasani, ndërsa ka përmendur edhe organizimin politik e ushtarak të tij së bashku me Ekrem Jasharin, Xhavit Gashin e Vezir Jasharin, duke formuar kështu edhe njësitin e parë të UÇK-së në këtë anë.
Nait Hasani ka thënë se luftën e shenjtë të UÇK-së dhe gjakun e derdhur për liri, sot po vërehen tendenca ta anatemojnë padrejtësisht edhe pse lufta për çlirim që bënë shqiptarët ishte e pastër, përkundër krimeve dhe gjenocidit që bënë armiqtë.
"Sot po kërkohet të krijohet një gjykatë, kinse për të dënuar krimet e luftës të UÇK-së, ndërsa jo edhe të serbëve", ka thënë deputeti Nait Hasani.
Kryetari i organizatës së Veteranëve të Luftës, Nazmi Krasniqi ka shpalosur disa prej momenteve më të rëndësishme nga aktivitetet e Rexhep Bislimit, që nga pjesëmarrja në demonstrata e deri tek aksionet e armatosura.
Ndërsa veprimtari Ekrem Jashari ka theksuar se koha kur ka vepruar Rexha ka qenë e vështirë dhe sfiduese, por shpirti i tij i madh patriotik bëri që ai të vihej në ballë të organizimit të luftës dhe masovizimit të saj. Jashari ka thënë se luftën e bënë njerëzit që e deshën atdheun dhe u tubuan nga gjitha trevat shqiptare për t’i dhënë goditjen, ndërsa këta nuk i bashkoi ndonjë interes, por çlirimi i Kosovës që po lëngonte nga robëria.
Në emër të familjes, të pranishmit i ka falënderuar vëllai i heroit, dr. Kemajl Bislimi.
Për më tepër, Rexhep Bislimi u lind më 13.9.1966 në Ferizaj. Para se të migronin në qytet, familja e tij kishte jetuar në Stubëll të Poshtme të Vitisë. Rexhep Bislimi shkollën fillore dhe atë të mesme Ekonomike i kreu në vendlindje. Edhe pse kishte dëshirë të vazhdonte shkollimin nuk arriti sepse kushtet në familje ishin të rënda dhe duhej t’i dilte në ndihmë familjes. Por më vonë e regjistroi SH. L. Teknike në Ferizaj, mirëpo shkollimin ia ndërprenë arrestimet dhe burgjet që pasuan. Qysh i ri, si 15 vjeçar, ai merr pjesë në demonstratat e famshme gjithëpopullore të vitit 1981 dhe më 1983, hyri në radhët e organizuara të lëvizjes ilegale të Kosovës. Rexhep Bislimi e vazhdoi veprimtarinë luftarake deri në ditët e kidnapimit të tij nga policia serbe më 6 korrik të 1998, pak ditë para se të hidhej në malet e Jezercit, si i fundit nga bashkëluftëtarët e tij që deri në atë kohë vepruan në qytet e rrethinë. Ai torturohet në mënyrën më barbare dhe më çnjerëzore për dy javë rresht pandërprere nga UDB-shët dhe policët serbë dhe më 19 korrik dërgohet në spital të Prishtinës në gjendje shumë të rëndë. Si rezultat i gjithë kësaj gjendjeje vjen deri te vdekja e paevitueshme më datë 21 korrik të vitit 1998.
Akademinë përkujtimore e ka bërë më solemne një program i begatshëm kulturor, pikat e të cilit u pritën me duartrokitje.
Rexhep Bislimi, model i vetëmohimit dhe gatishmërisë për sakrificë.
