Këtij suksesi i është gëzuar edhe ministrja e tregtisë dhe industrisë Hikmete Bajrami, e cila theksoi se ky është një lajm shumë i mirë që në këtë fundvit një biznes kosovar rrite kapacitete e prodhimit.
Nga ana tjetër kryetari i Odës Ekonomike të Kosovës, Safet Gërxhaliu vlerësoi se këta janë hapa të ngadalshëm, por të sigurt të rritjes së ndërmarrjeve vendore, por edhe shumë të dobishme.
Ndërkaq kryetari i komunës së Ferizajt Muharrem Svarqa tha se ndihet shumë krenar që ky biznes ferizajas po shënon rritje të vazhdueshme dhe në këtë mënyrë po forcon kënaqshëm edhe gjithë ekonominë lokale.
“Shpreh kënaqësinë time që gjendem në një ngjarje domethënëse për ekonominë, trendet zhvillimore dhe mirëqenien e qytetarëve tanë. Besoj sinqerisht se Eurometal ka zgjedhur mënyrën më të mirë për ta përmbyllur vitin 2015 duke përuruar një investim të ri, të cilit duhet t’i gëzohen jo vetëm menaxhmenti i kësaj firme, të punësuarit e këtushëm dhe familjet e tyre, por duhet t’i gëzohemi të gjithë ne, sepse çdo investim i ri, sjell preokupime të reja, sjell shpresa dhe ballafaqime me sfidat që ka mjedisi ynë afarist, por edhe mjedisi ynë jetësor.
Investimet e reja, kudo që të bëhen, prandaj edhe këtu në Eurometal, tregojnë kurajon e menaxhmentit, përpalljen e mirë me kushtet aktuale të të bërit biznes, planifikimin dhe vizionet për të ardhmen. Ato janë dëshmi se me këmbënguljen e duhur, me përzgjedhjen e profilit të qëlluar të produkteve dhe shërbimeve në raport me tregun dhe nevojat e tij, mund të arrihet zhvillim i kënaqshëm”, ka thënë kryetari Svarqa.
Kurse vet pronari i kompanisë "Eurometal" Njazi Musliu ndau me të pranishmit një rrëfim prekës kur para disa vitesh ishte në mëdyshje të rrijë me familje në Zvicërr apo të vijë në Kosovë për të ushtruar këtë veprimtari dhe tha se nuk u pendua për asnjë moment që u kthye, sepse ia doli të ndihmojë veten dhe të tjerët me biznesin e ngritur.
Fabrika për prodhimin e konstruksioneve metalike dhe të çelikut "Eurometal" në Babush të Ferizajt ka nisur punën nga viti 1993 dhe deri më tani ka më shumë se 70 të punësuar . Eksportin e produkteve të saj tashmë ka arritur ta bëjë nëpër disa vende të zhvilluara evropiane.
Kompania për prodhimin e konstruksioneve metalike dhe të çelikut "Eurometal" e cila veprimtarin e vet e zhvillon në Babush të Ferizajt, të premten ka hapur edhe një linjë të re prodhimi.
