Kryetari Svarqa uron ferizajasit me rastin e 8-vjetorin e Pavarësisë së Kosovës
16/02/2016 00:00
Të dashur ferizajas
Në 8-vjetorin e Pavarësisë së Kosovës, realiteti ynë ekonomik, politik, shoqëror e kulturor, duke mjaft sfidues. Gjatë këtyre tetë viteve, për herë të parë në historinë tonë, kemi qenë më të lirë se kurrë, për ta ndërtuar mirëqenien dhe mjedisin tonë jetësor, ashtu siç dimë ta bëjmë ne. Jemi ballafaquar me mundësitë, aftësitë, vullnetet dhe qasjet tona për zgjidhjen e shumë sfidave të përditshmërisë. I kemi pasur e vazhdojmë t’i kemi një milion probleme që sjell jeta, por kryesorin e kemi zgjidhur më 1999 – atë të lirisë e të pavarësisë. Që nga ky vit e tutje, për herë të parë na është hapur horizonti i madh, shansi që nuk e kemi pasur kurrë më parë, që ta jetojmë, ta shijojmë e ta ndërtojmë jetën tonë sipas mundësive e aftësive tona.
Çdo përvjetor, ne shtrojmë pyetjen: Çfarë kemi bërë për këto vite të lirisë e pavarësisë? Arritjet, secili i mat me kutin e vet dhe i sheh në mënyrën e vet. Por, një gjë është e sigurt: çdo vit jemi më mirë se më parë, kemi më shumë investime, rrugë, shkolla, objekte të reja për qytetarët dhe ngritje të mirëqenies së përgjithshme. Natyrisht që jemi larg standardit të jetesës së vendeve perëndimore, por duhet t’ia kujtojmë vetes se atë standard askush nuk ua ka falur perëndimorëve. E kanë krijuar vetë me përpjekje të gjata, me punë e djersë. Këtë gjë duhet të bëjmë edhe ne. Ta zhvillojmë kultin e punës e të mësimit. Një shoqëri punëtore dhe e ditur, nuk mund të mbetet e pazhvilluar. Dhe këtë zhvillim nuk mund ta bëjë i vetëm as një kryetar komune, as një kryeministër, as një president. Zhvillimin e një vendi e bëjnë forcat krijuese të tij, vizionet e njerëzve të ditur e të guximshëm, e bën një popull i përkushtuar për ndërtimin e të sotmes dhe të ardhmës më të mirë.
Të dashur ferizajas,
Unë ju ftoj që ta ngulisim në mendjet tona këtë opsion, opsionin e përkushtimit për ta ndërtuar mirëqenien në vendin tonë. Sepse, opsioni tjetër është të shikojmë mundësinë që të shpërndahemi e të tretemi nëpër botë, sapo të krijohen kushtet. Shpërndarjen nëpër botë e kemi provuar një herë më 1999, nga mizoritë e luftës. Por, atëherë ky popull dëshmoi se e do më shumë jetesën modeste në vendin e vet, se statusin e refugjatit në vende të tjera. Ndaj, të punojmë së bashku që ta ndërtojmë jetesën tonë, t’i përgatisim më mirë për jetë fëmijët dhe të rinjtë tanë, ta kultivojmë kulturën e punës e të mësimit, kulturën e ndërtimit, kreativitetit e vizionit zhvillimor, t’i gëzojmë frytet e punës sonë këtu ku i kemi rrënjët dhe vendin e jetesës, në mënyrë që të mos e lakmojmë të huajën.
Duke besuar në të nesërmën më të mirë për të gjithë, ju uroj 8 – vjetorin e Pavarësisë. Gëzuar!
Svarqa: Në 8-vjetorin e Pavarësisë së Kosovës, realiteti ynë ekonomik, politik, shoqëror e kulturor, duke mjaft sfidues. Gjatë këtyre tetë viteve, për herë të parë në historinë tonë, kemi qenë më të lirë se kurrë, për ta ndërtuar mirëqenien dhe mjedisin tonë jetësor, ashtu siç dimë ta bëjmë ne. Jemi ballafaquar me mundësitë, aftësitë, vullnetet dhe qasjet tona për zgjidhjen e shumë sfidave të përditshmërisë. I kemi pasur e vazhdojmë t’i kemi një milion probleme që sjell jeta, por kryesorin e kemi zgjidhur më 1999 – atë të lirisë e të pavarësisë. Që nga ky vit e tutje, për herë të parë na është hapur horizonti i madh, shansi që nuk e kemi pasur kurrë më parë, që ta jetojmë, ta shijojmë e ta ndërtojmë jetën tonë sipas mundësive e aftësive tona.
Të dashur ferizajas